პოლიტიკა
საქართველოს საგარეო საქმეთა სამინისტრო „სააკაშვილისა და თევანიანის კავშირზე ინფორმაციას არ ფლობს“
თბილისი, 25 აპრილი, საქინფორმი. ამის შესახებ საქართველოს საგარეო საქმეთა მინისტრის მოადგილე ნინო კალანდაძემ ტრადიციულ ბრიფინგზე საქართველოს პრეზიდენტ მიხეილ სააკაშვილისა და მოსკოვის ჯავახკი სომხების თემის მეთაურ ნორაირ თევანიანის კავშირების შესახებ მასმედიაში გავრცელებული ცნობების კომენტირებისას განაცხადა. მისი თქმით, „საქართველოს რეგიონი სამცხე-ჯავახეთი, სადაც კომპაქტურად ცხოვრობენ ეთნიკური სომხები, არაფრით განსხვავდება ქვეყნის სხვა რეგიონებისგან, ადგილობრივ მოსახლეობასა და ცენტრალურ ხელისუფლებას შესანიშნავი ურთიერთობა აქვთ“. ჟურნალისტების შეკითხვებზე პასუხისას კალანდაძემ აღნიშნა, რომ „ამ სტატიას არ იცნობს და სააკაშვილისა და თევანიანის კავშირების შესახებ ინფორმაციას არ ფლობს“.
(დღეს „საქინფორმი“ რუბრიკაში „პოლიტიკა“ საგანგებოდ საქართველოს საგარეო საქმეთა სამინისტროსთვის აქვეყნებს შენიშვნას „ქართულ-სომხური ძმობა: მიშა სააკაშვილი&ნორიკ ახალქალაქსკი“. ის რუსეთის საინფორმაციო სააგენტო „რეგნუმის“ მასალების მიხედვით არის დაწერილი, რომელიც, თავის მხრივ, სომხურ ბეჭდურ მედიას ეყრდნობა)
„რაც შეეხება ამ რეგიონისადმი საქართველოს ხელისუფლების დამოკიდებულებას, მისი მოსახლეობა ისეთივე პატივისცემით სარგებლობს, როგორითაც დანარჩენი საქართველოს მოსახლეობა. რეგიონული თანამშრომლობის ფარგლებში სამცხე-ჯავახეთის მოსახლეობასთან კარგი და საქმიანი ურთიერთობა გვაქვს. ჩვენ ვითვალისწინებთ ადგილობრივი მოსახლეობის ინტერესებს, რომლის უმრავლესობა სომხური დიასპორის წარმომადგენლები არიან. ჩვენ მჭიდრო ურთიერთობა გვაქვს სომხეთთან და ოფიციალურ შეხვედრებზე ჯავახეთის სომეხთა ინტერესები სრულფასოვნად არის წარმოდგენილი“, – აღნიშნა მინისტრის მოადგილემ.
