სამართალი
„ქრისტიან-დემოკრატები“ – „ბუდა-ბარების“ წინააღმდეგ
თბილისი, 18 აპრილი, საქინფორმი. „საპარლამენტო ფრაქცია „ქრისტიან-დემოკრატები“ საკანონმდებლო ცვლილებების პაკეტს ამზადებს, რომლებიც ეროვნული თვითმყოფადობისა და მორალური ნორმების შენარჩუნებას ითვალისწინებს“, – განაცხადა პრესკონფერენციაზე „ქრისტიან-დემოკრატიული მოძრაობის“ ლიდერმა გიორგი თარგამაძემ. „კონსტიტუცია მყარ საკონსტიტუციო გარანტიებს უნდა აძლევდეს მართლმადიდებელ ეკლესიას, ხოლო სახელმწიფოს ლეგიტიმური ბერკეტები უნდა ჰქონდეს იმისათვის, რომ თავიდან აიცილოს სულიერ-მორალური საფუძვლებისა და ეროვნული თვითმყოფადობის ხელყოფის საფრთხე“, – განაცხადა თარგამაძემ.
მისი თქმით, ცვლილებების პაკეტი შეეხება, აგრეთვე, კაზინოებისა და „ბუდა-ბარების“ მშენებლობას. „არსებობს ევროპული ქვეყნები, სადაც აკრძალულია კაზინოებისა და „ბუდა-ბარების“ მშენებლობა რელიგიური ცენტრებისა და სასწავლო დაწესებულებების მახლობლად ანდა მსგავსი დაწესებულებების განლაგების რეგულაცია ხდება. თავის დროზე თბილისის მერიამ არ გაითვალისწინა არც საქართველოს საპატრიარქოს პოზიცია, არც საერთაშორისო პრაქტიკა“, – აღნიშნა თარგამაძემ. ცვლილებების რეგისტრაცია პარლამენტის ბიუროს სხდომაზე უახლოეს მომავალში მოხდება. 
