სამართალი
„ლაღიძის წყლები“ საქართველოში ლობისტის არარსებობის გამო რუსეთში მიდის...
თბილისი, 13 აპრილი, საქინფორმი. „ლაღიძის წყლების“ სიროფის პირველი პარტია რუსეთის ბაზარზე აპრილის ბოლოს შევა“, – კომპანიის გენერალური დირექტორის მოადგილე ნანა ჩახაიას ინფორმაციით, ამ დროისათვის ქარხნის ტექნიკური მოწყობა დამთავრდება. რუსეთში სიმძლავრეს აძლიერებს ტიხვინის ქარხანა, რომელიც კომპანიის მიერ ლაღიძის სიროფზე გაცემული ლიცენზიის საფუძველზე ლიმონათს ჩამოასხამს. „ადგილობრივ ბაზარზე „ლაღიძის წყლების“ ნიშა მცირეა, რადგან მთავრობაში ლობისტი არ გვყავს. რუსეთის ბაზარზე კი მოთხოვნაა ლაღიძის ესენციაზე და კომპანია იქ თვეში დაახლოებით 80 ტონა სიროფს გაიტანს“, – ამბობს ნანა ჩახაია.
მისი თქმით, „ლაღიძის წყლები“ ერთადერთი კომპანიაა საქართველოში, რომელსაც რუსეთის ბაზარზე პროდუქციის ექსპორტის უფლება აქვს. „ჩვენ შევინარჩუნეთ სავაჭრო მარკა, რომელიც მადრიდის კონვენციის მიხედვით ჟენევაში დაგვიმტკიცეს. ის უშუალოდ რუსეთის ბაზრისთვის არის განკუთვნილი. ამიტომ გენადი ონიშჩენკომ და რუსეთის ხელისუფლებამ ბაზრიდან „ლაღიძის წყლების“ გამოძევება ვერ შეძლეს“, – ამბობს კომპანიის გენერალური დირექტორის მოადგილე.
ნანა ჩახაია ადგილობრივ ბაზარზე „ლაღიძის წყლების“ ნიშის გაფართოებას არ მოელის. „გადავწყვიტეთ, რომ კომპანია სიროფს მხოლოდ ექპორტზე გაიტანს. ადგილობრივ ბაზარზე ლაღიძის ჩამოსასხმელი წყალი, რამდენიმე გამონაკლისის გარდა, ფალსიფიცირებულია“. ჩახაიას თქმით, „ლაღიძის წყლების“ მენეჯმენტი ფალსიფიკაციას ამ მეთოდით უპირისპირდება.
