აქტუალური
რუსეთის თავდაცვის მინისტრი გადადგომას აპირებს
თბილისი, 5 აპრილი, საქინფორმი. რუსეთის თავდაცვის უწყების ხელმძღვანელმა ანატოლი სერდიუკოვმა ითხოვა, პრეზიდენტ ვლადიმერ პუტინის ინაუგურაციის შემდეგ თანამდებობაზე აღარ დააბრუნონ. გაზეთ „РБК daily“-ს ინფორმაციით, თავდაცვის მინისტრს, რომელსაც ხელახლა დანიშვნის ყველა შანსი ჰქონდა, არმიის სარდლობა აღარ სურს. „ის ძალიან დაიღალა ამ საომარი ბაკქანალიით, დაუსრულებელი რეფორმით, პირადი შემადგენლობის უპატივცემულობით, ამიტომ უფრო წყნარ ადგილზე გადაყვანა ითხოვა, – გვამცნო მაღალჩინოსანმა წყარომ თავდაცვის სამინისტროში, – ახლა მისთვის აქტიურად ეძებენ ახალ თანამდებობას“.
წყაროს მონაცემებით, სერდიუკოვს მთელი პატივით გააცილებენ – როგორც ადამიანს, რომელმაც რუსეთის არმიას ახალი იერი შესძინა. „ბოლო კოლეგიაზე პრეზიდენტ დიმიტრი მედვედევის შექება და პრემიერ-მინისტრ ვლადიმერ პუტინისაგან გაუკრიტიკებლობა ამას აშკარად მოწმობს“, – აღნიშნა გაზეთის თანამოსაუბრემ თავდაცვის სამინისტროდან.
მთავარ სამხედრო პოსტზე ყველაზე მოსალოდნელი კანდიდატები არიან ვიცე-პრემიერი თავდაცვის დარგში დიმიტრი როგოზინი და სახმელეთო ჯარების მთავარსარდალი ალექსანდრ პოსტნიკოვი.
ანატოლი სერდიუკოვთან ერთად წასვლას გენშტაბის უფროსი ნიკოლაი მაკაროვიც აპირებს. ექსპერტები აღნიშნავენ, რომ სერდიუკოვი მთელი სერიოზულობით ემზადება გადადგომისთვის და უკვე თავისი გუნდიც გაუშვა.
