აქტუალური
„აზერბაიჯანს უცხო სახელმწიფოებისათვის აეროდრომები არ დაუთმია“
თბილისი, 30 მარტი, საქინფორმი. ისრაელის ზოგიერთმა მედიასაშუალებამ ჟურნალ „Foreign Policy“-ში გამოქვეყნებულ სტატიაზე დაყრდნობით გაავრცელა ინფორმაცია, თითქოს აზერბაიჯანმა ისრაელს ირანის საზღვრის მახლობლად მდებარე აეროდრომი დაუთმო. წყაროების მტკიცებით, ისრაელმა აზერბაიჯანის სამხედრო-საჰაერო ძალების ოთხი მიტოვებული ბაზის გამოყენების უფლება მიიღო, რომლებიც ირანის საზღვართანაა განლაგებული. „აშშ ყურადღებით ადევნებს თვალს ირანში მიმდინარე მოვლენებს, მაგრამ ახლა იმასაც ვაკვირდებით, რას აკეთებს ისრაელი აზერბაიჯანში. და ვერ ვიტყვი, რომ ამით ბედნიერები ვართ“, – განაცხადა ვაშინგტონელმა მაღალჩინოსანმა.
სპეციალისტები აღნიშნავენ, რომ ირანზე თავდასხმის შემთხვევაში აზერბაიჯანული აეროდრომების გამოყენება მნიშვნელოვანწილად შეამცირებს ისრაელის დამოკიდებულებას საწვავის შესავსებ თვითმფრინავებზე. აშშ-ის სადაზვერვო უწყებაში განაცხადეს, რომ ბენზინის მნიშვნელოვანი ეკონომია ირანზე თავდასხმის შესაძლებლობას გაცილებით უფრო რეალურს ხდის. „ეს არ ნიშნავს, რომ ისრაელი უეჭველად დაესხმის თავს ირანს, მაგრამ ეს ამ ნაბიჯისათვის აქტიურ მზადებას მოწმობს“, – აღნიშნავენ წყაროები.
აზერბაიჯანის თავდაცვის სამინისტრო უარყოფს უცხოურ მედიასაშუალებებში გავრცელებულ ინფორმაციას აზერბაიჯანის ტერიტორიაზე განთავსებული რომელიმე აეროდრომის უცხოეთის სახელმწიფოებისთვის დათმობის თაობაზე. როგორც „Trend“ იუწყება, ამის შესახებ თავდაცვის სამინისტროს პრესსამსახურის ხელმძღვანელის მოადგილე თეიმურ აბდულაევმა განაცხადა. მისი თქმით, ამგვარი ინფორმაციისათვის არანაირი საფუძველი არ არსებობს, ეს გამონაგონია და სინამდვილეს არ შეესაბამება. პრეზიდენტის ადმინისტრაციის საზოგადოებრივ-პოლიტიკური განყოფილების ხელმძღვანელმა ალი გასანოვმა ჟურნალისტებს განუცხადა, რომ აზერბაიჯანის ტერიტორია არასოდეს იქნება გამოყენებული ირანის წინააღმდეგ მიმართული რაიმე ქმედებისათვის.
