პოლიტიკა
სააკაშვილის გამოსვლა სეულში ბირთვული უსაფრთხოების სამიტზე

saakaSvili-v-seuleთბილისი, 27 მარტი, საქინფორმი. საქართველოს პრეზიდენტმა მიხეილ სააკაშვილმა სამხრეთ კორეის დედაქალაქ სეულში ბირთვული უსაფრთხოების სამიტის მონაწილეებს სიტყვით მიმართა. პრეზიდენტის ადმინისტრაციის ინფორმაციით, გაიხსნა პლენარული სესია „ეროვნული ზომების მიღება და საერთაშორისო თანამშრომლობა ბირთვული უსაფრთხოების გაძლიერების მიზნით, მათ შორის, სამომავლო ვალდებულებების ჩათვლით“.

მიხეილ სააკაშვილმა სიტყვით გამოსვლისას ყურადღება გაამახვილა ბირთვული უსაფრთხოების საკითხების გადაუდებლად მოგვარების აუცილებლობაზე და გამოსვლის მნიშვნელოვანი ნაწილი რუსეთის ოკუპაციის თემას დაუთმო.

საქართველოს პირველმა პირმა ბირთვული და რადიოაქტიური უსაფრთხოების შესაძლებლობების გაძლიერების მიზნით, მხარეებს თანამშრომლობის გაღრმავებისა და ძალისხმევის გაორმაგებისკენ მოუწოდა.

მიხეილ სააკაშვილმა, ასევე, თბილისის მიერ არაკონტროლირებადი ქართული ტერიტორიებიდან – აფხაზეთიდან და ცხინვალის რეგიონიდან – მომდინარე საფრთხეებზე ისაუბრა და ხაზგასმით აღნიშნა იმ საშიშროებების შესახებ, რომლებიც ამ რეგიონებში საერთაშორისო მონიტორინგის არარსებობის გამო დგას. ამ საფრთხეების თავიდან ასაცილებლად საქართველოს პრეზიდენტმა მსოფლიო ლიდერებს საერთაშორისო მექანიზმების უფრო აქტიურად ამოქმედებისკენ მოუწოდა.

ბირთვული უსაფრთხოების გაძლიერების აუცილებლობას, ბირთვული ნივთიერებების უკანონო გავრცელების საფრთხეებსა და 2010 წლის ვაშინგტონის სამიტის შემდეგ მიღწეულ პროგრესს გამოსვლისას სამიტის ყველა მონაწილე შეეხო.

განხილვის შედეგები პლენარული სესიის შემდეგ სეულში შეკრებილ ლიდერთა ერთობლივ კომუნიკეში აისახა.