თბილისი, 23 მარტი, საქინფორმი. როგორც საქინფორმს პოლიტიკური პარტიის – „განახლებული საქართველოსთვის“ – პრესსამსახური ატყობინებს, პარტიის თავმჯდომარე ნანა გულუა და ლიდერები მცხეთა-მთიანეთის რეგიონში რაიონული ორგანიზაციების ხელმძღვანელებს შეხვდნენ. პარტიის წევრებმა შეხვედრაზე ტერიტორიულ-ზონალური დაყოფის აუცილებლობასა და ორგანიზაციების მუშაობის კონტროლის მექანიზმის სრულყოფაზე ისაუბრეს. პარტიაში აცხადებენ, რომ მცხეთა-მთიანეთის რეგიონში  მიღებული შედეგების მიხედვით ისინი პარტიაში გაწევრების მსურველთა კიდევ უფრო მაღალ აქტივობას ელიან.

მათივე თქმით, მხოლოდ მცხეთის რაიონში პარტიას უკვე 900-ზე მეტი მხარდამჭერი ჰყავს.  მცხეთა-მთიანეთის  რეგიონში სულ  90 000 ამომრჩეველია, მათ შორის, 6 000 დევნილია.

პარტიის თავმჯდომარე ნანა გულუამ შეხვედრის მონაწილეებს დეტალურად განუმარტა პარტიის შექმნის ძირითადი მოტივაცია და სტრატეგიული მიმართულებები. აღინიშნა, რომ პარტიის უმთავრეს პრიორიტეტებს ამომრჩეველთან მიმართებაში დასაქმება, სოციალური პრობლემების გადაწყვეტა და ტერიტორიული მთლიანობის აღდგენა წარმოადგენს.

„ქართველი გლეხის გაძლიერება ჩვენი უმთავრესი პრიორიტეტია, რადგან მხოლოდ ტურიზმით ქვეყანას ვერ გადავარჩენთ  და ეს უკვე პრაქტიკამაც აჩვენა“, – განაცხადა ნანა გულუამ.