თბილისი, 21 მარტი, საქინფორმი. სასტუმრო „ჰოლიდეი ინში“ მიმდინარეობს საერთაშორისო კონფერენცია „უსაფრთხოება სამხრეთ კავკასიაში“. კონფერენცია დიდი ბრიტანეთისა და საქართველოს საგარეო საქმეთა სამინისტროების ორგანიზებით იმართება.

კონფერენციაზე განიხილება საერთაშორისო ორგანიზაციების როლი რეგიონში უსაფრთხოების ხელშეწყობის კუთხით, რეგიოული ენერგოუსაფრთხოების საკითხები და დემოკრატიზაციის პროცესები.

როგორც დიდი ბრიტანეთის ელჩმა ჯუდით გოფმა მისასალმებელ სიტყვაში აღნიშნა, კონფერენციის ფორმატი დისკუსიების მეშვეობით ურთიერთობის უნიკალურ შესაძლებლობას აძლევს მონაწილე მხარეებს, რათა განიხილონ სამხრეთ კავკასიაში არსებული შესაძლებლობები და გამოწვევები, დასახონ სამომავლო სტრატეგიები რეგიონში უსაფრთხოების საკითხების გადასაჭრელად.

კონფერენციის მონაწილეებს მიმართა საგარეო საქმეთა მინისტრმა გრიგოლ ვაშაძემ. მისი განცხადებით, კონფერენციაში მონაწილე მაღალი რანგის სტუმრების საკითხების ღრმად ცოდნა და ხედვა საინტერესო და დეტალურ დებატებს განაპირობებს, რაც რეგიონში უსაფრთხოებას შეუწყობს ხელს.

„მოხარული ვართ, რომ უკვე მეორედ ვმასპინძლობთ უილტონ პარკის კონფერენციას თბილისში, განსაკუთრებით, ასეთ გლობალური თუ რეგიონული ტურბულენტობის პერიოდში, რომელიც, ამავე დროს, ბევრ შესაძლებლობას ქმნის. წარსული გამოცდილება და ცოდნა გვაძლევს საბაბს, ვიფიქროთ, რომ რეგიონის ადგილის და მნიშვნელობის დამკვიდრება ევროპისა და ევროატლანტიკური სტრუქტურების დღის წესრიგში განმსაზღვრელია რეგიონში უსაფრთხოების შენარჩუნების საქმეში“, - განაცხადა გრიგოლ ვაშაძემ.