თბილისი, 12 მარტი, საქინფორმი. როგორც საქინფორმის მკითხველი გივი მომცელიძე სოციალურ ქსელ „Facebook“-ის გვერდზე აქვეყნებს, საფრანგეთის ყოფილი საგანგებო და სრულუფლებიანი ელჩი საქართველოში ერიკ ფურნიე 2012 წლის თებერვალში ჩაანაცვლეს რენო სალენსით (ყოფილი დიპლომატი ამერიკის შეერთებულ შტატებსა და ირანში).

მკითხველის აზრით, მისი მოღვაწეობა ამ ქვეყანაში არ დასრულებულა – ყოფილი ელჩი ერიკ ფურნიე შესაძლოა, ივანიშვილის მრჩეველი გახდეს საერთაშორისო ურთიერთობების საკითხებში – ამის შესახებ ინფორმაციას არც უარყოფს და არც ადასტურებს ივანიშვილის პრესსამსახური. „ჩვენს ხელთ არსებული ინფორმაციით, შემოთავაზება პირადად ივანიშვილისაგან მიიღო ჯერ კიდევ დეკემბერში და საუბარი იმდენად სერიოზული იყო, რომ ფურნიემ საშობაო არდადეგებიც კი არ გაატარა ოჯახთან ერთად, ის საქართველოში იმყოფებოდა და მოლაპარაკებებს აწარმოებდა ივანიშვილთან, – წერს ბატონი მომცელიძე. – ამბობენ, რომ ივანიშვილისაგან ამ შემოთავაზებას ფურნიე არ დათანხმდებოდა, რომ არა მისი და ივანიშვილის საერთო მეგობრის, საფრანგეთის პრეზიდენტ ნიკოლა სარკოზის პირადი თხოვნაც, რომელმაც მწვანე შუქი აუნთო ამ შეთავაზებას“.

მომცელიძის ხელთ არსებული ინფორმაციით, ფურნიე უხელმძღვანელებს დიპლომატიურ კორპუსსა და საერთაშორისო ორგანიზაციებთან ურთიერთობას. უნდა აღინიშნოს, რომ ერიკ ფურნიეს საკმაოდ მჭიდრო კონტაქტები აქვს ისეთ გავლენიან ორგანიზაციებთან, როგორებიცაა, ამნისტი ინტერნეიშენელი, ჰააგის ტრიბუნალი (ამ უკანასკნელის მოსამართლე ანიტა უშაკა, სხვათა შორის, მისი და ივანიშვილის გუნდში გადაბარგებული მინდია უგრეხელიძის ძალიან ახლო მეგობარია).