თბილისი, 12 მარტი, საქინფორმი. სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმიდესმა და უნეტარესმა ილია მეორემ საკვირაო ქადაგებაში ადამიანის მიერ საკუთარი თავის შეცნობის სირთულეზე ისაუბრა და ბრძანა, რომ ყველაზე რთული ის არის,  რომ ჩვენ ვერ შევიცანით თავი თვისი და ვერ გავიცანით – ვინ ვართ. პატრიარქმა ძველი რომაელების ფრაზა გაიხსენა: „შეიცანი თავი შენი“.

„შევხედავთ ჩვენს თვისებებს, ჩვენს ნაკლს, მაგრამ საიდან წარმოიქმნებიან და მოდიან ისინი?!  ჩვენ უკვე ვხედავთ დაცემას ან კეთილის, ან ცუდი საქმის გაკეთებას, მაგრამ ეს უცებ არ ხდება. ეს მთელი პროცესია და ეს უნდა ვიცოდეთ, რათა ავიცილოთ თავიდან ესა თუ ის დაცემა“, – ბრძანა კათოლიკოს-პატრიარქმა და წმიდა მამების სიტყვები გაიხსენა, რომლებიც ამბობდნენ, რომ პირველი ცოდვა შედის ადამიანის ძვალში და იქვე თუ არ გადაეღობე, შემდეგ გადადის გულში, შემდეგ – სხეულში და შემდეგ მისგან განშორება გვიანია.

როგორც უწმიდესმა და უნეტარესმა აღნიშნა, ადამიანი არის ხატება ღვთისა. მას გააჩნია მრავალი სისუსტე, სისუსტე – აზროვნებასა და სიკეთის კეთებაში, მაგრამ ბოროტების კეთებაში მარჯვეა, რადგან პირველი ცოდვა, რომელიც დაუშვეს ადამმა და ევამ, ეს კვლავ მოქმედებს და როგორც ბეჭედი, ისე დაესვა ადამიანის გონებასა და გულს.

„არიან ადამიანები, რომლებიც ადვილად ებრძვიან თავის თავს, მაგრამ არის ადამიანი, რომელიც ვერ ებრძვის თავს და ხშირად ვარდება ცოდვაში. ზოგიერთი ადამიანი მატარებელია ქრისტეს ნათელისა“, – ბრძანა ილია მეორემ და განმარტა, რომ ზოგიერთი ადამიანის სახლში შემოსვლისას სახლი ნათდება და თითქოს სიკეთე და სინათლე შემოაქვს, მაგრამ არიან ისეთი ადამიანები, რომლებსაც ბოროტება შემოაქვთ ოჯახში.