თბილისი, 28 თებერვალი, საქინფორმი. როგორც საქინფორმი იტყობინებოდა, მიმდინარე წლის 25 თებერვალს საქართველოს პრეზიდენტმა მიხეილ სააკაშვილმა გორში, თავდაცვის აკადემიაში, სიტყვით გამოსვლისას განაცხადა, რომ „შექმნილია სპეციალური ჯგუფი, რომელმაც პრეზიდენტის დავალებით დაიწყო მუშაობა იერუსალიმის ჯვრის მონასტრის საქართველოსთვის დაბრუნების საკითხზე“.

„ყველას მოვუწოდებთ, გვერდზე დაგვიდგეს ამ ამბავში. მადლობელი ვართ ისრაელის  სახელმწიფოსი, რომელიც თანამშრომლობაზე მზადყოფნას გამოთქვამს“, – განაცხადა სააკაშვილმა.

„ამ საკითხთან დაკავშირებით აქტიურად მუშაობს საქართველოს ელჩი ისრაელში... რთული სათქმელია, რა ეტაპზე არის მოლაპარაკებები“, – განაცხადა კალანდაძემ.

დღეს კი ებრაულმა მედიამ აღნიშნულ საკითხზე გაავრცელა ინფორმაცია, რომლის მიხედვითაც, შეიძლება დავასკვნათ, რომ საქართველოს ხელისუფლებამ იცრუა. კერძოდ, საინფორმაციო პორტალი „IzRus“-ის ინფორმაციით, ისრაელი საქართველოსთვის იერუსალიმის ჯვრის მონასტრის დაბრუნების შესახებ მოლაპარაკებების არსებობას არ ადასტურებს.

იმავე ინფორმაციით, ისრაელის საგარეო საქმეთა სამინისტროში და პრემიერ-მინისტრის აპარატში ამის შესახებ ინფორმაცია არ აქვთ.  „ეს ჩვენთვის სიახლე იყო. მსგავსი არაფერი მსმენია“, – განუცხადა „IzRus“-ის კორესპონდენტს ისრაელის საგარეო უწყების პრესსპიკერმა იგალ პალიმორმა.