პოლიტიკა
ავღანეთში კიდევ სამი ქართველი სამხედრო დაიღუპა!

msxverpli-avganetiთბილისი, 22 თებერვალი, საქინფორმი. როგორც საქინფორმი იტყობინებოდა, საქართველოს პრეზიდენტი მიხეილ სააკაშვილი მიმდინარე წლის 20 თებერვალს ავღანეთში, ჰელმანდის პროვინციაში „შუკვანის“ ბაზაზე იმყოფებოდა, სადაც ქართველ სამხედროებს შეხვდა. სიტყვით მიმართვისას პრეზიდენტმა განაცხადა: „გვინდა, გვყვავდეს სერიოზული, ბრძოლისუნარიანი შეიარაღებული ძალები? – ჩვენ უნდა ვიყოთ ავღანეთში! გვინდა, გვქონდეს ჩვენი მოკავშირეების მხარდაჭერა, მათ შორის, ჩვენი შეიარაღებული ძალების შემდგომი მომზადების მხარდაჭერასა და აღჭურვაში? – ჩვენ უნდა ვიყოთ ავღანეთში! გვინდა, საქართველოს რეპუტაცია მყარად გავიტანოთ და ადგილი დავიმკვიდროთ დემოკრატიულ სამყაროში? – ამაყი ვარ, რომ დავდივარ სხვადასხვა ფორუმებზე და ვხვდები, მაგალითად, ავსტრალიისა და დიდი ბრიტანეთის ლიდერებს, სხვა დიდი დემოკრატიული ქვეყნების ლიდერებს და ისინი მადლობას მიხდიან იმისათვის, რასაც თქვენ აქ აკეთებთ. განსაკუთრებული მოწიწებით ეპყრობიან საქართველოს დელეგაციებს იმის გამო, რასაც თქვენ აქ აკეთებთ“...

ავღანეთიდან საქართველოს პრეზიდენტის გამოფრენის შემდეგ კი საქართველომ ISAF- ის სამშვიდობო მისიაში კიდევ სამი სამხედრო დაკარგა.

საქართველოს თავდაცვის სამინისტროს ინფორმაციით, სამხედრო მოსამსახურეები, რომლებიც ასრულებდნენ საბრძოლო ამოცანას, თალიბებთან შეტაკებისას საბრძოლო მანქანის აფეთქების შედეგად დაიღუპნენ.

„საქართველოს თავდაცვის სამინისტრო მწუხარებას გამოთქვამს ავღანეთში სამშვიდობო მისიის შესრულების დროს ქართველი სამხედროების, კაპრალების – ვალიკო ბერაიას, რუსლან მელაძისა  და პაატა კაჭარავას გარდაცვალების გამო.

გარდაცვლილი სამხედრო მოსამსახურეები მე-3 ქვეითი ბრიგადის 31-ე მსუბუქი ქვეითი ბატალიონის შემადგენლობაში „ISAF“-ის სამშვიდობო მისიის ფარგლებში ჰელმანდის პროვინციაში მსახურობდნენ“, – ნათქვამია სამინისტროს მიერ გავრცელებულ სპეციალურ განცხადებაში.

აღნიშნულ შემთხვევამდე „ISAF“-ის სამშვიდობო მისიის ფარგლებში ავღანეთში მსახურობის დროს სულ 13 ქართველი სამხედრო დაიღუპა და 87 დაიჭრა. შესაბამისად, ბერაიას, მელაძისა და კაჭარავას ჩათვლით, ავღანეთში სულ 16 ქართველი სამხედროა დაღუპული.