აქტუალური
„თავისუფალი საქართველო“ ხელისუფლებას რუსეთთან დიალოგისკენ მოუწოდებს

1kukava11თბილისი, 23 იანვარი, საქინფორმი. როგორც საქინფორმს „თავისუფალი საქართველოს“ პრესსამსახურიდან აცნობეს, პარტია მიიჩნევს, რომ ქართულმა პოლიტიკურმა ძალებმა უნდა იხელმძღვანელონ არა ვლადიმერ პუტინის პერსონალური იმიჯით და ვიწრო პარტიული ინტერესებით – რუსეთთან დიალოგით არ გაანაწყენონ პირადი ლობისტები დასავლეთში, არამედ საქართველოს ეროვნული ინტერესებით, რაც გულისხმობს ჩვენი ქვეყნის ტერიტორიული მთლიანობის აღდგენას და რუსეთთან კეთილმეზობლური ურთიერთობის ჩამოყალიბებას.

„როგორც რუსეთის პრემიერ-მინისტრმა ვლადიმერ პუტინმა განაცხადა, რუსული მხარე მზად არის, ქართველ საზოგადოებასთან ერთად დაიწყოს ჩვენს ქვეყნებს შორის ურთიერთობების დარეგულირების პროცესი... საქართველოს ხელისუფლებას კი არაერთხელ განუცხადებია, რომ ის მზად არის, დაიწყოს მოლაპარაკებები რუსულ მხარესთან. „თავისუფალი საქართველო“ მიიჩნევს, რომ ეს არის ქართულ-რუსული ურთიერთობების დარეგულირების რეალური შანსი. მნიშვნელოვანია, საქართველოს ხელისუფლებამ გამოიჩინოს პოლიტიკური ნება და დაიწყოს რუსეთთან პრობლემატურ საკითხებზე დიალოგი“, – აცხადებს პარტიის ლიდერი კახა კუკავა.

ამასთან, მისი თქმით, „თავისუფალი საქართველო“ რამდენიმე თვეა, აწარმოებს რუსულ მხარესთან მოლაპარაკებებს სავაჭრო ურთიერთობების აღდგენაზე და მზადაა, მომავალშიც აქტიური მონაწილეობა მიიღოს ქართულ-რუსული ურთიერთობების დარეგულირებისკენ მიმართულ ნებისმიერ პროცესში.