სამართალი
ივანიშვილი–ხვედელიძის სარჩელზე გადაწყვეტილება 27 დეკემბერს გახდება ცნობილი

ivan-xvedelთბილისი, 22 დეკემბერი, საქინფორმი. ბიზნესმენ ბიძინა ივანიშვილისა და მისი მეუღლე ეკატერინე ხვედელიძის სარჩელთან დაკავშირებით თბილისის საქალაქო სასამართლოს გადაწყვეტილება მიმდინარე წლის 27 დეკემბერს, 14:00 საათზე, გამოცხადდება. საქმის არსებითი განხილვა დღეს დასრულდა. მოსამართლემ გადაწყვეტილების გამოცხადების ვადად სწორედ 27 დეკემბერი დაასახელა.

დღევანდელ სასამართლო სხდომაზე მხარეებმა იპაექრეს, ბოლოს კი მათ რეპლიკის საშუალება მიეცათ. მოსარჩელე მხარის წარმომადგენლები შეეცადნენ, დაესაბუთებინათ, რატომ უნდა გაუქმდეს პრეზიდენტის 2011 წლის 11 ოქტომბრის გადაწყვეტილება ბიძინა ივანიშვილისა და ეკატერინე ხვედელიძისთვის საქართველოს მოქალაქეობის შეწყვეტასთან დაკავშირებით.

მოპასუხე მხარის – პრეზიდენტის წარმომადგენელმა, კი განაცხადა, რომ პრეზიდენტის ბრძანებულება კანონსა და პროცედურებს ეფუძნებოდა.

როგორც ცნობილია, 2011 წლის 11 ოქტომბერს საქართველოს პრეზიდენტმა მოქალაქეობა შეუწყვიტა ბიძინა ივანიშვილსა და მის მეუღლე ეკატერინე ხვედელიძეს. ივანიშვილისა და ხვედელიძის წარმომადგენლებმა პრეზიდენტის გადაწყვეტილება თბილისის საქალაქო სასამართლოში გაასაჩივრეს და მის ბათილად ცნობას ითხოვენ.