პოლიტიკა
პატრუშევის ვიზიტი სოხუმში

ankvab-patrushevთბილისი, 17 დეკემბერი, საქინფორმი. „აფსნიპრესის“ ცნობით, რუსეთის უშიშროების საბჭოს მდივანი ნიკოლაი პატრუშევი აფხაზეთის ლიდერ ალექსანდრე ანქვაბს შეხვდა სოხუმში სამუშაო ვიზიტის ფარგლებში.

„ჩვენ ვისაუბრეთ იმაზე, თუ ჩვენი სტრუქტურები როგორ უზრუნველყოფენ ერთობლივად აფხაზეთის უსაფრთხოებას“, – განაცხადა პატრუშევმა და დასძინა, რომ ამ მიმართულებით „უახლოეს მომავალში“ რიგი ორმხრივი დოკუმენტების გაფორმება იგეგმება.

ალექსანდრე ანქვაბის შეფასებით, უსაფრთხოების საკითხები „წარმატებით გვარდება“. „ჩვენ შემდგომშიც ამგვარად ვიმუშავებთ უსაფრთხოების თემაზე“, – განაცხადა ანქვაბმა.

„აფსნიპრესის“ ცნობით, რუსეთის უშიშროების საბჭოს მდივანმა გუდაუთაში განთავსებული რუსული სამხედრო ბაზა მოინახულა.

აფხაზეთში სტუმრობამდე პატრუშევმა რუსულ გაზეთ „არგუმენტი ი ფაქტისთან“ ინტერვიუში საქართველო საკუთარ ტერიტორიაზე „რუსეთში ტერორისტული აქტების განსახორციელებლად ადამიანების მომზადებაში“ დაადანაშაულა. თბილისში ამ ბრალდებებს უსაფუძვლო უწოდეს.