თბილისი, 15 დეკემბერი, საქინფორმი. ნაფიცმა მსაჯულებმა, რომელთა მონაწილეობითაც სასამართლო პროცესი საქართველოში უკვე მეორედ ჩატარდა, კვლავ გამამტყუნებელი განაჩენი გამოიტანეს.

საქმე 7 წლის წინათ №1 კოლონიაში 27 წლის ნოდარ მატიაშვილის მკვლელობას ეხება. განსასჯელის სკამზე სამი ბრალდებული – ვახტანგ ბეჟანიშვილი, რომეო სარქისოვი და ლევან კიკაბიძე ისხდნენ. მათგან ორი – ბეჟანიშვილი და სარქისოვი, რომლებმაც ჩადენილი დანაშაული აღიარეს და სასჯელის შემსუბუქება ითხოვეს, ნაფიცმა მსაჯულებმა დამნაშავედ ერთხმად ცნეს, კიკაბიძე კი დამნაშავედ 10-მა მსაჯულმა გამოაცხადა.

აღნიშნული საქმისთვის საგანგებოდ 12 ნაფიცი და 3 სათადარიგო მსაჯული შეირჩა.

შეგახსენებთ, რომ ნოდარ მატიაშვილი სასჯელაღსრულების №1 კოლონიის 84-ე საკანში ჩამომხრჩვალი 7 წლის წინათ იპოვეს.

ბრალდების მხარის მტკიცებით, ბრალდებულებმა მატიაშვილი ე.წ. ქურდული სამყაროს წევრების დაკვეთით მძინარე მოკლეს. საქმეში სულ 5 პირი ფიგურირებდა, რომელთაგან ერთმა გამოძიებასთან წლების წინათ ითანამშრომლა, კიდევ ერთი კი უკვე გარდაცვლილია.

განსასჯელებს ბრალად ედებათ ჯგუფურად დამამძიმებელ გარემოებებში განზრახ ჩადენილი მკვლელობა, რომელიც 20 წელზე მეტ ან უვადო პატიმრობას ითვალისწინებს.