თბილისი, 12 დეკემბერი, საქინფორმი. დღეს, 2011 წლის 12 დეკემბერს, საზოგადოებრივი მოძრაობა „ქართული ოცნების“ პირველი ოფისი „ჩვენი სახლი“ გაიხსნა. მოძრაობის მხარდამჭერებს ორგანიზაციაში გაწევრების შესაძლებლობა აქვთ. ამის შესახებ ადვოკატმა ეკა ბესელიამ  გუშინ ფილარმონიაში გამართული პრეზენტაციის დასასრულ ჟურნალისტებთან განაცხადა.  მისივე თქმით, მალე  ანალოგიური ოფისები  ყველა ქალაქში, საქართველოს მთელ ტერიტორიაზე,  გაიხსნება.

„საზოგადოებრივი მოძრაობა „ქართული ოცნება“  დღის წესრიგში აყენებს მთავარ იდეას – ეს არის ძლიერი, ერთიანი, ღირსეული, სამართლიანი საქართველო. ყველას შეუძლია იყოს ამ პროცესის თანამონაწილე. საქართველოს მთელ ტერიტორიაზე უნდა გაიშალოს „ქართული ოცნება“ და მასში საქართველოს ყველა მოქალაქემ უნდა იპოვოს საკუთარი თავი“, – განაცხადა ეკა ბესელიამ. მისივე თქმით, საზოგადოებრივი მოძრაობის ფარგლებში სხვადასხვა საკითხზე თემატური ჯგუფები იმუშავებენ, დაიწყება საარჩევნო პროცესისთვის მომზადება და შეიქმნება პირობები პოლიტიკური პარტიის დასაფუძნებლად.