თბილისი, 7 დეკემბერი, საქინფორმი. ბანკმა „რესპუბლიკამ“, რომელიც ჯგუფ „სოსიეტე ჟენერალის“ წევრია, ბრიტანული ბანკი „HSBC“-ის შვილობილი კომპანია „HSBC Georgia“-ს საცალო პორტფელი შეიძინა.

„HSBC“-მ საქართველოს ბაზრის წლის ბოლომდე დატოვების გეგმების შესახებ სექტემბერში განაცხადა და ამ გადაწყვეტილების მოტივად მისი სტრატეგია დაასახელა, რომლის ფარგლებშიც ის საბანკო საქმიანობის მცირემასშტაბიან ბაზრებს ტოვებს.

გარიგების თანხა კონფიდენციალურობის მოტივით არ დასახელებულა, თუმცა  „HSBC“-ის ინფორმაციით, ამ პორტფელის მთლიანი ღირებულება 23 ნოემბრის მდგომარეობით 4.5 მლნ დოლარს შეადგენდა.

ბანკი „რესპუბლიკის“ გენერალურმა დირექტორმა კრისტიან კარმანიოლიმ განაცხადა, რომ ბანკი მოხარულია, მიიღოს  „HSBC“-ის 170 კლიენტი.