საზოგადოება
„თეთრები“ პრეზიდენტის იმპიჩმენტთან დაკავშირებით გამოკითხვის შედეგებს აქვეყნებს
თბილისი, 27 ნოემბერი, საქინფორმი. როგორც ახალი პოლიტიკური ძალა „თეთრი მოძრაობის“ პრესსამსახური საქინფორმს ატყობინებს, მოძრაობა საკუთარ ვებგვერდზე რამდენიმე თვის განმავლობაში მიმდინარე ინტერაქტიური გამოკითხვის შედეგებს აქვეყნებს პრეზიდენტ სააკაშვილის იმპიჩმენტთან დაკავშირებით.
„ხაზგასასმელია ერთი გარემოება, რომ მას შემდეგ, რაც პოლიტიკურ ასპარეზზე გამოვიდა ბატონი ბიძინა ივანიშვილი, თითქმის 10%-ით გაიზარდა იმპიჩმენტის მომხრეთა რაოდენობა სატელეფონო და ქუჩაში გამოკითხულთა შორის. სატელეფონო გამოკითხვის დროს იმპიჩმენტის მომხრეთა რაოდენობა შეადგენს 90%-ს (წინააღმდეგი მხოლოდ 2%-ია) და ქუჩაში გამოკითხულთა რაოდენობა 95%-ზე მეტია (წინააღმდეგი თითქმის არ არის), 4-5% თავს არიდებს პასუხს. აშკარაა, რომ ბოლო პერიოდის პოლიტიკურ მოვლენებს მოჰყვა ადამიანებში შიშის დაძლევა“, – ნათქვამია ანგარიშში.
პრეზიდენტის იმპიჩმენტთან დაკავშირებული ყველა დოკუმენტი, „ღირსების ულტიმატუმითა“ და „მხილების მუზეუმით“ დაწყებული და პრეზიდენტ სააკაშვილისათვის გაგზავნილი წერილით, უცხოელ ექსპერტთა მონაწილეობით შედგენილი „პრეზიდენტის უნდობლობის ვერდიქტით“ დამთავრებული, განთავსებულია თეთრების ვებგვერდზე.
