თბილისი, 23 ნოემბერი, საქინფორმი. შვეიცარიის კონფედერაციის პრეზიდენტი და საგარეო საქმეთა მინისტრი მიშელინ კალმი-რეი გამოცემა „Le Temps“-თან საუბარში საქართველო-რუსეთის მსოფლიო სავაჭრო ორგანიზაციასთან დაკავშირებით გამართული მოლაპარაკებების დეტალებს იხსენებს. შვეიცარია მოლაპარაკებებში შუამავლის როლს ასრულებდა და სწორედ მათ წამოაყენეს კომპრომისული წინადადება, რომელზეც ქართულმა და რუსულმა მხარეებმა თანხმობა განაცხადეს.

კალმი-რეი ამბობს, რომ ამოცანა ძალიან მკაფიო იყო: „ჩვენ ისე უნდა შეგვექმნა მსო-ს ნორმების დაცვის გარანტიები რუსეთსა და საქართველოს შორის საქონლის გადაადგილებაზე, რომ ეს არ შეხებოდა სამხრეთ ოსეთისა და აფხაზეთის სტატუსს“.

მისი განმარტებით: „ერთ-ერთ ჩემს დიპლომატს, რომელიც თბილისიდან დაბრუნდა, მკაფიო საბაჟო პუნქტების ნაცვლად საბაჟო დერეფნების შექმნის შესანიშნავი იდეა გაუჩნდა. ეს ნოვატორული იდეა დაგვეხმარა იმაში, რომ პროცესი ერთი შეხედვით ჩიხური სიტუაციიდან გამოგვეყვანა".

ამგვარად, საუბარია ციფრული დაკვირვების ქვეშ არსებულ სამ დერეფანზე, რომლებშიც შეიძლება გადაადგილდეს საქონელიც და ხალხიც.

სტატიის ავტორი წერს: „კალმი-რეის კარგად ესმოდა, რომ მთელი საერთაშორისო საზოგადოება დაინტერესებული იყო რუსეთის მსოფლიო სავაჭრო ორგანიზაციაში გაწევრებით“.

„ამოცანა იყო ცხადი: რუსეთისთვის უნდა მიგვეცა საშუალება, მსო-ში 2011 წლის დეკემბერში გაწევრებულიყო. ასეთ პირობებში შეთანხმების მიღწევის ბოლო ვადა 10 ნოემბერი გახდა“, - განაცხადა კალმი-რეიმ.

მისი თქმით, შედეგის მისაღწევად ისინი შეეცადნენ, რომ მხარეები რაციონალურ განსჯამდე მიეყვანათ.

„ჩვენ შევეცადეთ, საკითხის სირთულე შეგვემცირებინა, დავყავით რა პრობლემა რამდენიმე ნაწილად და ვმოქმედებდით მაქსიმალურად მეთოდურად“, – ამბობს მიშელინ კალმი-რეი.

მისი თქმით, ასეთი ტიპის მოლაპარაკებებში ყოველთვის არის როგორც აღმასვლის, ისე დამავალი ფაზები, ამიტომ უკიდურესად მომთმენი უნდა იყო.

„ზოგჯერ კვირების განმავლობაში გიწევს ერთ სიტყვაზე, ერთ მძიმეზე დავა. ასეთი მოლაპარაკებების დროს ადგილი აქვს ხოლმე ძალიან მგრძნობიარე მომენტებს. ატმოსფერო დაძაბულია. ადამიანები გამოსავლის ძიებაში თავს არ ზოგავენ. ამ დროს მყარდება კავშირები, ჩნდება სიახლოვე“, – განაცხადა კალმი-რეიმ.

შვეიცარიის პრეზიდენტი იხსენებს მის ბოლო ვიზიტს რუსეთსა და საქართველოში, როდესაც ორივე ქვეყნის პრეზიდენტებს შეხვდა.

„ჩვენი ბოლო ვიზიტის დროს რუსეთსა და საქართველოში 31 ოქტომბერს ჩვენ ორივე ქვეყნის პრეზიდენტებს უნდა შევხვედროდით. ძალიან ვნერვიულობდით, რადგან ზოგიერთ პუნქტთან დაკავშირებით გადაწყვეტილება ჯერ მიღწეული არ იყო. თვითმფრინავში ჩვენი ჰოროსკოპები შევამოწმეთ. ჩემი ჰოროსკოპი ძალიან კარგი აღმოჩნდა. მასში ნათქვამი იყო: „კარგი დღეა საუბრებისთვის, რომელსაც შეიძლება რთული სიტუაციების გარკვევა ან გადაწყვეტა მოჰყვეს“, – იხსენებს კალ-მირეი.

მისი განმარტებით, კომპრომისული გადაწყვეტილება, პირველ რიგში, სასარგებლო იყო რუსეთისთვის, რომელიც შეძლებს მსოფლიო სავაჭრო ორგანიზაციაში გაწევრებას და საერთაშორისო საზოგადოებისთვის, „რომელსაც რუს პარტნიორთან ვაჭრობის წარმოება გაუადვილდება. შვეიცარიას ამ საქმეში თავისი ინტერესი აქვს. ჯერ ერთი, იმიტომ, რომ ჩვენ რუსეთში დიდ ექსპორტს ვაწარმოებთ. მეორეც, მჭიდრო ხშირმა კონტაქტებმა რუსეთთან ხელი შეუწყო ორმხრივი საკითხების ჩვენ სასარგებლოდ გადაწყვეტას: შევთანხმდით ძვირფას ლითონებზე საათების მწარმოებლებისთვის. უახლოეს დღეებში, როგორც ჩანს, გადაწყდება შვეიცარიული თვითმფრინავების რუსეთის ტერიტორიის გავლით ფრენის საკითხიც“, – აღნიშნავს კალმი-რეი.