თბილისი, 16 ნოემბერი, საქინფორმი. „ქრისტიან-დემოკრატების“ ერთ-ერთი ლიდერის –  ლევან ვეფხვაძის, განცხადებით, „45-60 წლის ასაკის ადამიანებმა უნდა იცოდნენ, რომ მათ „ნაციონალური მოძრაობა“ მხოლოდ ერთი – საარჩევნო წლის განმავლობაში ასაქმებს“. ამის თქმის საფუძველს ოპოზიციონერ დეპუტატს პარლამენტში ინიცირებული „საგადასახადო კოდექსში“ შესატანი ცვლილებების პროექტი აძლევს, რომელშიც პირდაპირ წერია, რომ „საშემოსავლო გადასახადისგან თავისუფლდება 45-დან 60 წლამდე ასაკის პირის მიერ კერძო სამართლის იურიდიული ან ფიზიკური პირისგან ხელფასის სახით მიღებული შემოსავალი მუშაობის დაწყებიდან ერთი წლის განმავლობაში“.

„45-დან 60 წლამდე ასაკის ადამიანების დასასაქმებლად მიღებული გადაწყვეტილება პირდაპირ არის მიბმული არჩევნებსა და საარჩევნო წელზე. პრეზიდენტის მიერ გაჟღერებული საგადასახადო შეღავათის ვადა საარჩევნო წელიწადის შემდეგ იწურება და ბუნებრივია, დამსაქმებელს მათი შენარჩუნების არანაირი ვალდებულება აღარ ექნება. მოკლევადიანი და არაეფექტური სამუშაო ადგილები კი ამ ასაკობრივი კატეგორიის ადამიანების რეალურ დასაქმებას ნამდვილად ვერ უზრუნველყოფს. ერთი წლით მუშაობა ცუდი არ არის, მაგრამ ამ ხალხმა წინასწარ უნდა იცოდეს, რომ „ნაციონალური მოძრაობა“ მათ მხოლოდ ერთი – საარჩევნო წლის განმავლობაში ასაქმებს“, – განუცხადა სააგენტო „პირWელს“ ვეფხვაძემ.

ამასთან, აღნიშნული საგადასახადო შეღავათით ამ ასაკობრივი კატეგორიის ის პირები ისარგებლებენ, რომლებიც მუშაობას 2012 წლის 1 იანვრიდან 2012 წლის 1 ივლისამდე დაიწყებენ.