აქტუალური
ქიბარ ხალვაში: „ჩვენ ერთად უნდა ავიხდინოთ „ქართული ოცნება“

qibarთბილისი, 2 ნოემბერი, საქინფორმი. გერმანიაში მცხოვრები ქართველი ბიზნესმენი ქიბარ ხალვაში, რომელიც ბიძინა ივანიშვილისა და საქართველოში მიმდინარე პოლიტიკური პროცესისადმი მხარდაჭერას გამოხატავს, სპეციალურ მიმართვას ავრცელებს, რომელშიც აღნიშნავს, რომ უკეთესი მომავლის იმედი და შანსი გაჩნდა.

„ბიძინა ივანიშვილის გადაწყვეტილებამ აღადგინა პოლიტიკური წონასწორობა და რეალური გახადა იმედი, რომ ქვეყანაში მოხდეს პოლიტიკური და ეკონომიკური ცხოვრების ძირეული გარდატეხა ქვეყნის ინტერესების სასარგებლოდ. ვიმედოვნებ, მალე დადგება დრო, როდესაც ვეღარავინ წაგვართმევს თავისუფლებას, ვეღარავინ გამოგვკეტავს ციხეში ან გაგვაძევებს სახლიდან და საკუთარი სამშობლოდან იმიტომ, რომ გაგვაჩნია ჩვენი აზრი; როდესაც ჩვენვე განვსაზღვრავთ საკუთარ მომავალს და ვიცხოვრებთ ისე, როგორც ვიმსახურებთ. თითოეულ ჩვენგანზეა დამოკიდებული ჩვენი ქვეყნის მომავალი. ჩვენ ერთად უნდა ავიხდინოთ „ქართული ოცნება“, მხარი დავუჭიროთ პროცესებს და არ ვიყოთ მაყურებლის როლში. შიში და პასიურობა სააკაშვილის და იმ ხელისუფლების წისქვილზე ასხამს წყალს... ვფიქრობ, ახლაა დრო, ყველამ ერთად ვუთხრათ უარი ტოტალურ სიყალბეს – ვითომ მოგებულ ომს, ქაღალდის პირველობას, ქვიშის სასახლეებს და შუშის ეკონომიკას“, – ნათქვამია ხალვაშის მიმართვაში.

ამასთან, ბიზნესმენი განსაკუთრებულად მიმართავს საქმიან ადამიანებს და მათ სწორი მოქალაქეობრივი პოზიციის დაკავებას სთხოვს. „ბიძინა ივანიშვილს, ქველმოქმედ ადამიანს, წაართვეს უფლება, იყოს იმ ქვეყნის მოქალაქე, რომლისთვისაც უამრავი სიკეთე გაუკეთებია. მე, როგორც ბიზნესში გათვითცნობიერებული ადამიანი, ვაცხადებ, რომ ის ყველაზე წარმატებული ქართველი ბიზნესმენია. ბიზნესში ასეთი წარმატების მიღწევა კი გონიერების, პროფესიონალიზმისა და სანდოობის გარეშე შეუძლებელია, რაც ასე ჭირს დღევანდელ ხელისუფლებაში“, – აცხადებს ხალვაში.

მიმართვის დასასრულ ბიზნესმენი კიდევ ერთხელ აფიქსირებს მხარდაჭერას ბიძინა ივანიშვილისადმი და გამოთქვამს მზადყოფნას, შეძლებისდაგვარად თავადაც შეიტანოს წვლილი საერთო საქმეში.