საზოგადოება
ზუგდიდელი დევნილები შველას ითხოვენ

devnilebi222ზუგდიდი, 2 ნოემბერი, საქინფორმი. ზუგდიდის კომბინატის დასახლებაში, ელექტროქვესადგური „ზუგდიდი I“-ის ადმინისტრაციულ შენობაში მცხოვრები 13 დევნილი ოჯახი დევნილთა ადგილობრივ სამმართველოს საკუთარი უფლებების დარღვევაში ადანაშაულებს. აჭარისა და სამეგრელო-ზემო სვანეთის დევნილთა სამმართველოს უფროსის მოადგილე გოჩა ელერჯიამ მიმდინარე წლის 17 აგვისტოს დევნილებს ფოთის ჩასახლებაში გადაყვანის შეთანხმებაზე ხელი მოაწერინა და ახალ რაიონში გადასაყვანად ბარგის შეკვრა სთხოვა, თუმცა ამ დასახლებიდან არცერთი დევნილი ოჯახი არ წაუყვანიათ.

„პირუტყვი გვყავდა და თავს იმით ვირჩენდით, რომ გვითხრეს, ბარგი შეკარითო, გავყიდეთ და ახლა გვეუბნებიან, თქვენი ადგილი ფოთში არ არის და 2012 წლის ბოლომდე აქ დარჩებითო“, – აცხადებს საქინფორმთან საუბრისას დევნილი ტრისტან გვაგვალია.

ამასთან, დევნილების თქმით, ელექტროქვესადგურს გამოსხივება აქვს, რის გამოც მობინადრეებს სხვადასხვა დაავადება განუვითარდათ.

აჭარისა და სამეგრელო-ზემო სვანეთის დევნილთა სამმართველოს უფროს ლევან მიქავას თქმით, „აღნიშნულ ობიექტთან დაკავშირებით ცვლილებები და ამ ობიექტში მცხოვრები დევნილების ფოთში ჩასახლება ახლო მომავალში არ იგეგმება“.