სამართალი
„თავისუფალი საქართველო“ დედოფლისწყაროს მუნიციპალიტეტს ანტიეროვნულობაში ადანაშაულებს

sapatioთბილისი, 26 ოქტომბერი, საქინფორმი. როგორც „თავისუფალი საქართველოს“ დედოფლისწყაროს ორგანიზაცია საქინფორმს აცნობებს, დედოფლისწყაროს მუნიციპალიტეტმა 2011  წლის 21 ოქტომბრის საკრებულოს სხდომაზე მიიღო განკარგულება 5 პიროვნებისთვის საპატიო მოქალაქეობის მინიჭების შესახებ. მათ შორის იყო სოფელ მირზაანის ფიროსმანის სახლ-მუზეუმის დირექტორი ანზორ მაძღარაშვილი. წინა დღეს გავრცელდა მისი სამართლიანი პროტესტი ფიროსმანის სახლ-მუზეუმთან მისასვლელი გზის ავარიულობასთან დაკავშირებით. ბატონი ანზორი გულისტკივილსაც გამოთქვამდა იმ ფაქტთან დაკავშირებით, რომ ერთლარიანი, რომელზეც ფიროსმანი იყო გამოხატული, ხმარებიდან ამოიღეს. იგი ამბობდა, რომ საქართველო ღირსი არ არის ფიროსმანის. ამ პროტესტის მერე ბატონი ანზორ მაძღარაშვილი, ჭეშმარიტი მამულიშვილი, ამ საპატიო სიიდან ამოიღეს. აღსანიშნავია ის ფაქტი, რომ ბატონი ანზორი მთელ ძალას და ენერგიას ხარჯავს, რომ  საქართველოს საამაყო  შვილის – ნიკო ფიროსმანის, სახლ-მუზეუმში მისი ნახატები სათანადოდ იქნეს დაცული, რათა ეს ეროვნული საგანძური თაობიდან თაობას გადაეცეს.

„თავისუფალი საქართველოს“ დედოფლისწყაროს ორგანიზაცია აპროტესტებს ამ ფაქტს და მუნიციპალიტეტის ხელმძღვანელებს, კერძოდ კი, საკრებულოს თავმჯდომარე ლევან ბაღაშვილს ანტიეროვნულობაში სდებს ბრალს. ადამიანს, რომელიც უვლის, უფრთხილდება კახელების საამაყო შვილის ექსპონატებს, საპატიო მოქალაქის კი არა, ღირსების მედლით უნდა აჯილდოებდნენ. „მოვითხოვთ, 2007 წელს მუზეუმიდან წაღებული და სიღნაღის გალერეაში  „დროებით“ გამოფენილი შედევრები „მუშა სოსო“ და „მალაკნების ქეიფი“ დააბრუნონ მირზაანში. ეს ნახატები ფიროსმანისაა და მისი სახელობის მუზეუმში უნდა ინახებოდეს! ვეთანხმებით ბატონ ანზორს, მაგრამ დავამატებდით ერთს, საქართველო კი არა, საქართველოს ახლანდელი მთავრობა არ არის ღირსი ფიროსმანის!“ – განაცხადა „თავისუფალი საქართველოს“ დედოფლისწყაროს ორგანიზაციის ხელმძღვანელმა თამილა გურაშვილმა.