ბათუმი, 17 ოქტომბერი, საქინფორმი. საქართველოში აშშ-ის საელჩოს ინფორმაციით, ამერიკის სამხედრო გემი „ფილიპინ სის“ ეკიპაჟი საქართველოს სანაპირო დაცვის გემებთან ერთად წვრთნებს გამართავს.

აღნიშნული ვიზიტი აშშ-ის არმიისა და საზღვაო ძალების ევროპული სარდლობის, ასევე, ამერიკის შეერთებული შტატების მეექვსე ფლოტის იმ სტრატეგიის ნაწილია, რომელიც რეგიონული სტაბილურობისა და საზღვაო პარტნიორობის განმტკიცებას ისახავს მიზნად. გემს აშშ-ის ელჩის მოადგილე ბრიჯით ბრინკი დახვდება.

„ფილიპინ სი“ „ტიკონდეროგა“ კლასის სამხედრო გემია. მას სახელი მეორე მსოფლიო ომისას ფილიპინების ზღვაში გამართული ბრძოლის პატივსაცემად მიენიჭა და ამ სახელწოდების ტარების პატივით დაჯილდოებული მეორე გემია.