საზოგადოება
ზუგდიდს ახალი დროშა და გერბი აქვს
ზუგდიდი, 13 ოქტომბერი, საქინფორმი. ზუგდიდის მუნიციპალიტეტს ახალი დროშა და გერბი ზუგდიდის მუნიციპალიტეტის საკრებულომ უკვე დაამტკიცა. გერბზე ზღვა, ოქროს საწმისი, ღვთისმშობლის კვართი და თეთრი რაშია გამოსახული. როგორც საკრებულოს თავმჯდომარე ლევან კონჯარიამ დეპუტატებს განუმარტა, თეთრი რაში თავისუფლების სიმბოლოა და ამიტომაც შეარჩიეს.
ზუგდიდის დროშა კი ორი ფერისგან შედგება. მასზე მთავარ სივრცეს შინდისფერი იკავებს, ხოლო ცენტრში ოქროსფრად ჯვარია გამოსახული. ლევან კონჯარიას განცხადებით, ეს დროშა XV საუკუნის ოდიშის დროშის მსგავსია.
ამასთან, საკრებულოს წევრებმა მხარი დაუჭირეს ზუგდიდის საპატიო მოქალაქის მედალიონის ესკიზსა და ქალაქის სიმბოლური გასაღების წარმოდგენილ მოდელებსაც.
