აქტუალური
სახელმწიფოს საკუთრებაში არსებული წილები და აქციები უცხოურ ბირჟაზე გავა
თბილისი, 11 ოქტომბერი, საქინფორმი. სახელმწიფოს საკუთრებაში არსებული წილებისა და აქციების უცხო ქვეყნის აღიარებულ საფონდო ბირჟაზე გატანა უკვე შესაძლებელია. ამასთან დაკავშირებით „სახელმწიფო ქონების შესახებ“ კანონში ცვლილება პარლამენტმა დღეს საბოლოოდ დაამტკიცა.
კანონპროექტის საპარლამენტო განხილვა ხმაურით მიმდინარეობდა. თუმცა უმრავლესობამ ოპოზიციის არცერთი შენიშვნა არ გაითვალისწინა. კერძოდ, კანონმდებლობაში არ ჩაიდო გარანტია იმისა, რომ სახელმწიფო საწარმოები მთლიანად არ გასხვისდება და საკონტროლო პაკეტი სახელმწიფოს საკუთრებაში დარჩება. მსგავსი დათქმა მხოლოდ ნავთობისა და გაზის ეროვნულ კომპანიასთან მიმართებაში არსებობს.
აღნიშნული კანონპროექტი 30 სექტემბრის სხდომაზე უნდა დამტკიცებულიყო, თუმცა მაშინ კენჭისყრის პროცედურა ჩაიშალა.
უკვე ცნობილია, რომ ამ ცვლილების ამოქმედების შემდეგ „ნავთობისა და გაზის კომპანიის“ აქციების 24%-ის პრივატიზება იგეგმება.
