საზოგადოება
ბალნეოლოგიური კურორტის სამედიცინო ტექნიკით აღჭურვას იაპონია დააფინანსებს
თბილისი, 11 ოქტომბერი, საქინფორმი. როგორც იაპონიის საელჩოს პრესსამსახური საქინფორმს ატყობინებს, მარტის ტრაგიკული მოვლენების მიუხედავად, იაპონიის მთავრობამ არა მხოლოდ გააგრძელა შეპირებული პროექტების განხორციელება საქართველოში, არამედ გეგმავს 8 ახალი პროექტის დაფინანსებასაც მომავალი წლისთვის. ერთ-ერთი პროექტის – თბილისის ბალნელოგიური ცენტრის სამედიცინო აღჭურვილობის გაუმჯობესების – ხელმოწერის ცერემონია გაიმართება იაპონიის საელჩოში 2011 წლის 12 ოქტომბერს, 11:00 საათზე.
ღონისძიებას დაესწრებიან იაპონიის ელჩი საქართველოში, ბატონი მასაიოში კამოჰარა, საქართველოს ჯანდაცვის მინისტრის პირველი მოადგილე, ბატონი ირაკლი გიორგობიანი, ბალნეოლოგიური კურორტის დირექტორი, ბატონი ნიკოლოზ სააკაშვილი, ვატიკანის ელჩის მოვალეობის შემსრულებელი, მონსინიორ ფილიპო ჩამპანელი, „კარიტას-საქართველოს“ ხელმძღვანელი, ბატონი ვიტოლდ შულჩინსკი და სხვები.
პროექტი ხორციელდება იაპონიის მთავრობის მიერ გამოყოფილი „გრასრუტებისა და ადამიანთა უსაფრთხოების გრანტის“ ფარგლებში. საგრანტო კონტრაქტს ხელი მოწერება იაპონიის საელჩოსა და არასამთავრობო ორგანიზაცია – „კარიტას-საქართველოს“ შორის. პროექტის მიზანია სამედიცინო სფეროს და თბილისის ბალნეოლოგიური კურორტის გაუმჯობესება სამედიცინო აღჭურვილობის გადაცემის გზით. პროექტის ღირებულება 90 583 აშშ დოლარს შეადგენს.
