თბილისი, 11 ოქტომბერი, საქინფორმი. „საზოგადოებრივი მაუწყებელი“ ბიზნესმენ ბიძინა ივანიშვილს, რომელმაც სულ ახლახან პოლიტიკაში მოსვლის სურვილი გამოთქვა, სტუდიაში პირადად მისვლას და ინტერვიუს პირდაპირ ეთერში მაუწყებლის სტუდიიდან გადაცემას სთავაზობს. როგორც მაუწყებლის მიერ გავრცელებულ განცხადებაშია ნათქვამი, „საზოგადოებრივი მაუწყებლის“ ეთერში გამოსვლა ბიძინა ივანიშვილმა თავად მოითხოვა და ბუნებრივია, მაუწყებელს ამ მოთხოვნაზე უარი არ უთქვამს“.

„დღეს გაიმართა შეხვედრა „საზოგადოებრივი მაუწყებლის“ გენერალურ დირექტორსა და ივანიშვილის პრესსამსახურის ხელმძღვანელ ირაკლი ტრიპოლსკის შორის, რომელზეც მაუწყებლის მხრიდან კიდევ ერთხელ დაფიქსირდა მზადყოფნა, ივანიშვილს ეთერი არსებული თოქშოუების ფარგლებში დაუთმოს. საზოგადოების ინტერესიდან გამომდინარე, სტუდიაში უნდა მობრძანდეს თავად ბატონი ივანიშვილი და არა მისი ნდობით აღჭურვილი რომელიმე პირი. ამასთან, ივანიშვილთან ინტერვიუ პირდაპირ ეთერში მუწყებლის სტუდიიდან უნდა გადაიცეს. ამ წინადადებებზე ივანიშვილის პრესსამსახურის მხრიდან პასუხს ველოდებით“, – ნათქვამია განცხადებაში.

გარდა ამისა, ივანიშვილს ერთობლივ პირდაპირ ეთერს სთავაზობენ ტელეკომპანიები „მაესტრო“ და „კავკასია“. როგორც „მაესტროს“ მიერ გავრცელებულ განცხადებაშია ნათქვამი, პირდაპირ ეთერში მონაწილეობა უნდა მიიღოს ბევრმა ჟურნალისტმა, რათა მაქსიმალურად დაკმაყოფილდეს საზოგადოების ინტერესი, რომელიც გამოწვეულია პოლიტიკურ ასპარეზზე ბიზნესმენის გამოჩენით. „ამ პირდაპირი ეთერის ნახვა მაყურებელს შეეძლება როგორც დედაქალაქში, ისე მთელი ქვეყნის მასშტაბით სატელიტური მაუწყებლობის მეშვეობით. აგრეთვე, ორივე ტელეკომპანია მზადაა, ამ ღონისძიებაში ჩართოს ყველა სხვა დაინტერესებული მედიასაშუალება, რადიოები და ინტერნეტმაუწყებლები“, – ნათქვამია განცხადებაში.