საქართველო, 20 აგვისტო, საქინფორმი. არასრულწლოვანთა აზარტულ თამაშებში ჩართვის ფაქტებთან დაკავშირებით სახელმწიფომ და მოზარდების მშობლებმა სათანადო ზომები უნდა მიიღონ, – ნათქვამია საქართველოს საპატრიარქოს განცხადებაში.

საპატრიარქოს განცხადების მიზეზი გახდა სოციალურ ქსელში გავრცელებული ვიდეო, რომელშიც ასახულია დასავლეთ საქართველოში, ქალაქ ზესტაფონში ბუკმეკერული კომპანიის მიერ არასრულწლოვანთა მონაწილეობით გამართული ღონისძიება.

„საკითხის სერიოზულობიდან გამომდინარე, აუცილებელია დროული და კოორდინირებული რეაგირება სახელმწიფოს, შესაბამისი უწყებებისა და მშობლების მხრიდან, რათა ბავშვები დაცულნი იყვნენ მავნე ჩვევებზე დამოკიდებულების ჩამოყალიბების რისკებისგან. არასრულწლოვანთა წახალისება ნებისმიერი ფორმით აზარტული თამაშებისკენ, თავისი არსით, ერის წინაშე ჩადენილი დანაშაულია“, – ნათქვამია განცხადებაში.

როგორც საპატრიარქოში მიაჩნიათ, არასრულწლოვანთა მსგავს ღონისძიებებში ჩართვა ხელს უწყობს აზარტული თამაშების პოპულარიზაციას და ბავშვებში მათ მიმართ ინტერესის ჩამოყალიბებას, ასევე წარმოადგენს ამ სფეროში მოქმედი ნორმატიული აქტების მოთხოვნების უხეშ დარღვევას.

„ამასთან დაკავშირებით, ერთი მხრივ, მოვუწოდებთ სახელმწიფოს, მაქსიმალური ყურადღება დაუთმოს საკითხს, შეისწავლოს მსგავსი შემთხვევები და აამოქმედოს ყველა შესაბამისი სამართლებრივი და ადმინისტრაციული მექანიზმი მათი აღკვეთისთვის“, – ნათქვამია განცხადებაში.

საპატრიარქოში ასევე აღნიშნეს, რომ მოზარდების აზარტულ თამაშებში ჩართვამ, თუნდაც გართობის ფორმით, შეიძლება ხელი შეუწყოს მათში ინტერესის გაღვივებას, შემდგომ კი – თამაშდამოკიდებულების (ლუდომანიის) ჩამოყალიბებას.

„აზარტულ თამაშებზე დამოკიდებულება საზოგადოებისა და ქვეყნისთვის ერთ-ერთ სერიოზულ პრობლემად რჩება, ხოლო იმისათვის, რომ ასეთ ადამიანებს დავეხმაროთ დამოკიდებულებისგან გათავისუფლებაში, ხშირად საჭიროა ხანგრძლივი და კომპლექსური, მათ შორის სამედიცინო და ფსიქოლოგიური დახმარება“, – ნათქვამია განცხადებაში.

საპატრიარქოში განაცხადეს, რომ მკაცრ რეაგირებას მოახდენენ მსგავს ფაქტებზე, რომლებიც მომავალი თაობის ჯანსაღი ცხოვრების წესს საფრთხეს უქმნის.

საქართველოში აზარტული თამაშების თამაში ეკრძალებათ 25 წლამდე ასაკის მოქალაქეებს, სოციალურად დაუცველ პირებსა და საჯარო მოხელეებს. 2022 წლის 1 მარტიდან აზარტულ თამაშებზე დამოკიდებულ პირს შეუძლია ლუდომანთა ოფიციალურ რეესტრში მოხვდეს ორი გზით: პირველ შემთხვევაში პირი თავად მიმართავს შემოსავლების სამსახურს, რის შემდეგაც შეჰყავთ რეესტრში; მეორე შემთხვევაში კი სასამართლოს მიმართავს მოთამაშის ოჯახი, და სასამართლოს დადებითი გადაწყვეტილების საფუძველზე იგი სიაში ხვდება. 2025 წლის მონაცემებით, ლუდომანთა ოფიციალურ რეესტრში 36 ათასზე მეტი ადამიანი იყო რეგისტრირებული.