საქართველო, 8 ივნისი, საქინფორმი. საქართველოს მონაწილეობის გარეშე, „3+3“ რეგიონული ფორმატის პერსპექტივები სრულფასოვანი ვერ იქნება, განაცხადა რუსეთის საგარეო საქმეთა მინისტრის მოადგილემ, მიხაილ გალუზინმა, იტყობინება „რია ნოვოსტი“.

გალუზინის თქმით, მოსკოვი საქართველოს მნიშვნელოვან პარტნიორად მიიჩნევს „3+3“ პლატფორმისთვის, რომელშიც შედიან აზერბაიჯანი, სომხეთი, საქართველო და ასევე მათი სამი მეზობელი - რუსეთი, თურქეთი და ირანი.

„განსაკუთრებით მივესალმები საქართველოს საექსპერტო წრეების წარმომადგენლის მონაწილეობას ჩვენს დისკუსიაში. ჩვენთვის და, დარწმუნებული ვარ, პლატფორმის ყველა მონაწილისთვის, საქართველო მნიშვნელოვან პარტნიორად რჩება, რომლის გარეშეც „3+3“-ის პერსპექტივები სრულფასოვანი ვერ იქნებოდა. იმედი მაქვს, რომ დროთა განმავლობაში ოფიციალური თბილისიც შემოუერთდება ჩვენს მუშაობას“, - განაცხადა მან სანქტ-პეტერბურგის საერთაშორისო ეკონომიკურ ფორუმზე.