საქართველო, 20 იანვარი, საქინფორმი. საქართველოს მოსახლეობის აღწერის საბოლოო მონაცემები 2026 წლის ივნისში გამოქვეყნდება, განაცხადა სტატისტიკის ეროვნული სტატისტიკის სამსახურის „საქსტატის" აღმასრულებელი დირექტორის მოადგილე პაატა შავიშვილმა.

მოსახლეობისა და სასოფლო-სამეურნეო აღწერა 2024 წლის ნოემბერ-დეკემბერში ჩატარდა, წინასწარი მონაცემები 2025 წლის ივნისის ბოლოს გამოქვეყნდა, რომლის თანახმად საქართველოს მოსახლეობამ 3 914 000 ადამიანი შეადგინა.

„წელს, აპრილის ბოლოსკენ გამოქვეყნდება მოსახლეობის სქესობრივ-ასაკობრივი შემადგენლობა მუნიციპალიტეტების და რეგიონების დონეზე, ხოლო 2026 წლის ივნისის ბოლოს გამოქვეყნდება სხვა დანარჩენი ინფორმაცია, რომელიც ეხება მოსახლეობის ეროვნებას, განათლებას, ქორწინებით მდგომარეობას, დასაქმება-უმუშევრობის შესახებ ინფორმაციას", - განაცხადა შავიშვილმა.

გარდა ამისა, გამოქვეყნდება მონაცემები მოსახლეობის საბინაო პირობების შესახებ და, რაც მთავარია, გამოქვეყნდება მონაცემები სასოფლო-სამეურნეო აღწერის შესახებ, რომელიც მოიცავს მიწის ფართობს, პირუტყვისა და ფრინველის რაოდენობას.

მისი თქმით, აღწერის ისტორიაში პირველად იყო დიგიტალიზაციის 100-პროცენტიანი პროცესი.

„ჩვენ მონაცემები არ შეგვიგროვებია ქაღალდის კითხვარის მეშვეობით. პროცესი იყო ორ ნაწილად განაწილებული. პირველ ეტაპზე განხორციელდა თვითრეგისტრაცია მოსახლეობის მიერ და შემდგომში უკვე ჩვენმა ინტერვიუერებმა პლანშეტების გამოყენებით ჩაატარეს კარდაკარ აღწერა", - განახადა შავიშვილმა.

საქართველოს მოსახლეობისა და სასოფლო-სამეურნეო აღწერა ჩატარდა 2024 წლის 14 ნოემბრიდან 31 დეკემბრის პერიოდში. აღწერაში მონაწილეობის მიღება შესაძლებელი იყო როგორც ვებგვერდზე ანკეტის შევსებით, ისე სახლში, „კარდაკარის“ თანამშრომლების კითხვებზე პასუხების გაცემით.