ქუთაისი, 9 სექტემბერი, საქინფორმი. საქართველოს პროფესიული კავშირების გაერთიანების ინფორმაციით, გაფიცვის მიზეზი საწარმოში არსებული მძიმე შრომითი პირობები და თანამშრომლების პროფკავშირული ნიშნით გათავისუფლებაა. სრულმასშტაბიანი გაფიცვა თანამშრომელთა მოთხოვნების დაკმაყოფილებამდე გაგრძელდება. 

აღსანიშნავია, რომ 2 სექტემბერს ქარხანაში გამართული გამაფრთხილებელი აქციის გამო 7 სექტემბერს ქარხნის ხელმძღვანელობამ კიდევ ოთხი თანამშრომელი – გიორგი შვანგირაძე, გიგა ელიაშვილი, გოჩა დარჯანია და ემილო ჭუმბურიძე – გაათავისუფლა.

„პროფკავშირები კომპანია „ევრაზიანსთილსის“ ქარხანა „ჰერკულესის“ ადმინისტრაციას სამ დღეს აძლევს და თუ ამ ხნის განმავლობაში ადმინისტრაცია პროფკავშირებთან მოლაპარაკებების გამართვასა და შეთანხმების დადებას არ დათანხმდება, „ჰერკულესში“ სრულმასშტაბიანი გაფიცვა დაიწყება“, – განმარტავენ პროფკავშირების გაერთიანებაში.

საქართველოს პროფესიული კავშირების გაერთიანების თავმჯდომარე ირაკლი პეტრიაშვილი დღეს ქუთაისში ჩავა და „ჰერკულესის“ კოლექტივს შეხვდება, რის შემდეგაც ქარხანასთან პრესკონფერენციასაც გამართავს.