საქართველო, 26 დეკემბერი, საქინფორმი. ევროკავშირში აშშ-ის ელჩი ენდრიუ პაზდერი ბრიუსელს ამერიკული კომპანიების მიმართ რეპრესიული პოლიტიკის გატარებაში ადანაშაულებს. ამერიკელი დიპლომატის განცხადებით, აშშ-ის კომპანიები, რომლებიც ევროკავშირის რეპრესიული და გამოხატვის თავისუფლების საწინააღმდეგო პოლიტიკის, ჯარიმებისა და მარეგულირებელი ორგანოების გადაჭარბებული ზემოქმედებისგან იტანჯებიან, სწორედ ის კომპანიებია, რომლებსაც შეუძლიათ ევროკავშირის ხელოვნური ინტელექტის სწრაფად მზარდ ეკონომიკაში ჩართვა.

„ეს ამერიკული კომპანიები საუკეთესო პოზიციაში არიან ინვესტიციების განსახორციელებლად, მონაცემთა ცენტრების ასაშენებლად, ღრუბლოვანი ტექნოლოგიების ხელმისაწვდომობის უზრუნველსაყოფად, დახვეწილი პროგრამებისა და პროგრამული უზრუნველყოფის გამოსაყენებლად იმ დონეზე, რაც აუცილებელია ევროკავშირის ხელოვნური ინტელექტის ეკონომიკაში მნიშვნელოვან მონაწილედ ქცევისთვის. ისინი უკვე ევროკავშირში არიან, ინვესტიციებს ახორციელებენ, ქმნიან სამუშაო ადგილებს, რომლებიც ამ მომსახურებას ისეთ დონეზე სთავაზობენ, როგორიც სხვა კომპანიებს არ შეუძლიათ. ისინი მზად არიან, გააკეთონ მეტი და მეტი, თუ საჭიროა, მაგრამ არა იმ რისკის ქვეშ, რომ დაწესდეს დამანგრეველი ჯარიმები და კეთილდღეობას მოკლებული მარეგულირებელი ორგანოების გადაჭარბებული გავლენა, რაც ზღუდავს სიტყვის თავისუფლებას და აფერხებს ეკონომიკურ ზრდას“, – განაცხადა ენდრიუ პაზდერმა.

​ამერიკელი დიპლომატის მტკიცებით, როგორც აშშ-ის პრეზიდენტმა, დონალდ ტრამპმა ნათლად განაცხადა – ტრამპის ადმინისტრაცია ენერგიულად დაუჭერს მხარს პოლიტიკას, რომელიც იცავს და ხელს უწყობს გამოხატვის თავისუფლებას და თანაბარი ენერგიით დაუპირისპირდება ამ ფუნდამენტური თავისუფლების უსამართლოდ შეზღუდვის მცდელობებს.

1tv.ge