თბილისი. 7 სექტემბერი. საქინფორმი. სკანდალური საიტი „wikileaks“-ის ინფორმაციით, 2008 წელს აშშ-ის ელჩი საქართველოში ჯონ ტეფტი ეკლესიასა და ხელისუფლებას შორის შესაძლო დაპირისპირებაზე საუბრობდა. ამ შინაარსის ანგარიში სახელწოდებით „საქართველოს ბიბლიისა და ღმერთის გარეშე მართვა შეუძლებელია“, „wikileaks“-ის ინფორმაციით, ტეფტმა სახელმწიფო დეპარტამენტს 2008 წლის 8 დეკემბერს გაუგზავნა.

„საქართველოს მართლმადიდებელი ეკლესია ქართველი საზოგადოების მნიშვნელოვანი ინსტიტუტია და ბევრისთვის სწორედ იგი განსაზღვრავს ქართველობას. ეთნიკურ არაქართველებს, რომლებიც მართლმადიდებელ ეკლესიასთან არ ასოცირდებიან, პოლიტიკური უფლებების დაკარგვა ემუქრებათ. ათეისტ ქართველთა უმრავლესობა, მათ შორის, პოლიტიკოსებიც, ეკლესიას ღიად არ ეწინააღმდეგებიან. ილია მეორე გამჭრიახი დიპლომატია, რომელსაც ქვეყნის შიდა პოლიტიკაში აქტიური ინტერესები აქვს, განსაკუთრებით კი – აფხაზეთისა და ე.წ. სამხრეთ ოსეთის სეპარატისტულ რეგიონებთან მიმართებაში. ამ კონტექსტში მან რუსეთშიც იმოგზაურა და რეგიონის პოლიტიკურ ლიდერებს შეხვდა. ეკლესიასა და სახელმწიფოს შორის შიდა ურთიერთობა სიმბიოზურია, ხოლო სხვა აღმსარებლობის ლიდერებთან მართლმადიდებელი ეკლესიის კონსერვატიულად განწყობილი წარმომადგენლების ურთიერთობა, რომლებიც საკუთარი გავლენის შენარჩუნებას და კიდევ უფრო გავრცელებას ცდილობენ, ხანდახან იძაბება“, – ნათქვამია დოკუმენტში.

ჯონ ტეფტი „ვარდების რევოლუციის“ შემდეგ განვითარებულ მოვლენებსაც აფასებს და აღნიშნავს, რომ „პატრიარქი ხშირად პოზიტიურ როლს თამაშობს“, რის მაგალითადაც აჭარის რევოლუციის, 2007 წლის არჩევნებისა და 2008 წლის აგვისტოს ომის პერიოდში პატრიარქის ქმედებები მოჰყავს. „საქართველოს დამოუკიდებლობის შემდეგ პატრიარქის როლი მკვეთრად იზრდება. სწორედ პატრიარქმა მონათლა ედუარდ შევარდნაძე, ხოლო შემდეგ „ვარდების რევოლუციით“ მოსულ ლიდერებსაც მხარდაჭერა გამოუცხადა, განსაკუთრებით კი – მიხეილ სააკაშვილს. პატრიარქი ყოველ წელს იმყოფება დამოუკიდებლობის დღისადმი მიძღვნილ აღლუმზე და პრეზიდენტის გვერდით დგას, ხოლო სააკაშვილისა და მისი მთავრობის წევრთა ხილვა საკვირაო ლოცვებზე ხშირადაა შესაძლებელი“, – წერს იმდროინდელი ელჩი.