საქართველო, 15 ოქტომბერი, საქინფორმი. ბაქო-თბილისი-ჯეიჰანის მილსადენის მეშვეობით ყაზახური ნავთობის ტრანზიტის მოცულობა გაიზრდება. აზერბაიჯანული სააგენტოს, „ტრენდის“ ცნობით, ამის შესახებ აზერბაიჯანის ენერგეტიკის მინისტრმა, ფარვიზ შაჰბაზოვმა აზერბაიჯანსა და ყაზახეთს შორის სავაჭრო-ეკონომიკური თანამშრომლობის მთავრობათაშორისი კომისიის სხდომაზე განაცხადა.

„ენერგეტიკის სექტორში SOCAR-სა და KazMunayGas-ს შორის თანამშრომლობა ყაზახური ნავთობის აზერბაიჯანის გავლით ტრანზიტის საკითხში წარმატებით ვითარდება. 2023 წლიდან დღემდე ბაქო-თბილისი-ჯეიჰანის ნავთობსადენით გლობალურ ბაზარზე 3.4 მილიონი ტონა ყაზახური ნავთობი იქნა ტრანსპორტირებული“, – აღნიშნა ფარვიზ შაჰბაზოვმა.

მინისტრმა აღნიშნა, რომ მხარეები განიხილავენ 2027 წლისთვის მიწოდების მოცულობის წელიწადში შვიდ მილიონ ტონამდე გაზრდას, რაც მნიშვნელოვანი ნაბიჯი იქნება ენერგეტიკული პარტნიორობის განმტკიცებისა და ყაზახეთის ექსპორტის მარშრუტების დივერსიფიკაციისთვის.

1tv.ge