საქართველო, 29 ივლისი, საქინფორმი. განსაკუთრებით პოპულარულია გუდაური, რომელიც თბილ სეზონზე მოლაშქრეებისთვის სამოთხედ იქცევა.

2025 წლის ზაფხულში რუსმა მოგზაურებმა პოსტსაბჭოთა რესპუბლიკებში ტურების მიმართ ინტერესი გაზარდეს, მოთხოვნის ზრდის მხრივ კი ლიდერი საქართველო გახდა - გასული წლის ანალოგიურ პერიოდთან შედარებით იგი 17%-ით გაიზარდა, ნათქვამია YouTravel-ის ბაზრის კვლევაში.

ანალიტიკოსების მონაცემებით, მოგზაურები მიმდინარე ზაფხულში უფრო აქტიურები გახდნენ ახალი მიმართულებების შესწავლის კუთხით, მოწინავე ადგილზე პოსტსაბჭოთა ქვეყნები არიან.

„ზრდის ტემპებით საქართველო ლიდერობს: ამ ქვეყანაში ტურებზე მოთხოვნა 17%-ით გაიზარდა. განსაკუთრებით პოპულარულია გუდაური, რომელიც თბილ სეზონზე მოლაშქრეებისთვის სამოთხედ იქცევა. აქ, ტურისტებით გადატვირთული სვანეთისგან განსხვავებით, შეგიძლიათ დატკბეთ ყაზბეგის ხედებით, არაგვის მთებით ან ვერტმფრენით გაემგზავროთ მყინვარზე“, - ნათქვამია კვლევაში.

2025 წლის პირველ ნახევარში საქართველომ მიიღო 3,2 მილიონი საერთაშორისო ვიზიტორი - 4,4%-ით მეტი გასული წლის ანალოგიურ პერიოდთან შედარებით. რაც შეეხება ტურისტულ ვიზიტებს, იგი 2024 წლის ორ კვარტალთან შედარებით 6,9%-ით გაიზარდა და 2,3 მილიონი შეადგინა.

საქართველოში ვიზიტების მხრივ რუსეთის მოქალაქეები ლიდერობენ - 2025 წლის იანვარ-ივნისში ქვეყანას 581,1 ათასი რუსეთის მოქალაქე ეწვია, რაც 2024 წლის ანალოგიურ პერიოდთან შედარებით 10,2%-ით მეტია.

sputnik-georgia.com