საქართველო, 28 მარტი, საქინფორმი. სამუშაო, რომელსაც შეასრულებს დროებითი კომისია, ხელისუფლებაში ყოფილი პრეზიდენტ მიხეილ სააკაშვილის მიერ დაფუძნებული „ერთიანი ნაციონალური მოძრაობის“ ყოფნის პერიოდში იმდროინდელი თანამდებობის პირების დანაშაულების გამოძიების პროცესში, შეიძლება გახდეს ამ პოლიტიკური ძალის ლიკვიდაციის საფუძველი, განაცხადა „ხალხის ძალის“ დეპუტატმა გურამ მაჭარაშვილმა.

დროებითი საგამოძიებო კომისია, რომელიც 2003-2012 წლებში მოქმედი „ერთიანი ნაციონალური მოძრაობის" რეჟიმისა და პოლიტიკური თანამდებობის პირების საქმიანობას შეისწავლის, პარლამენტში 5 თებერვალს შეიქმნა და სამი თვე იმუშავებს, შემდეგ კი ანგარიშს წარადგენს.

„ჩვენ გავდივართ აგვისტოს ომის საკითხებს. საზოგადოებას და კომისიას კიდევ ერთხელ გვინდა ვაჩვენოთ ის მაგალითები, რომლებიც ადასტურებს „ნაციონალური მოძრაობის“, როგორც დანაშაულებრივი რეჟიმის, არსებობას“, - განაცხადა მაჭარაშვილმა.

დეპუტატის თქმით, ძირითადად ყველა კითხვა ეხება პოლიტიკურ ხელმძვანელობას, მის პასუხისმგებლობას საომარ მოქმედებებში.

„კომისია ბოლომდე მოიძიებს იმ მტკიცებულებებს, რომლებიც, დარწმუნებული ვარ, გახდება საფუძველი "ნაციონალური მოძრაობის", როგორც პოლიტიკური ძალის, გაუქმების“, - აცხადებს გურამ მაჭარაშვილი.

ამჯერად კომისიის სხდომა „ნაცმოძრაობის“ დროინდელ სამხედრო ხელმძღვანელობას უსმენს. საგამოძიებო კომისიას აქვს კითხვები ლაშა ქოიავასთან, შალვა ჯანაშვილთან, ზაზა გოგავასთან და მამუკა ყურაშვილთან.

საქართველოს პარლამენტის რეგლამენტის თანახმად, დროებით საგამოძიებო კომისიას უფლება აქვს შესასწავლ საკითხთან დაკავშირებით გარკვეული გარემოებების გამო დაიბაროს ნებისმიერი პირის ან მიიღოს მისგან წერილობითი ახსნა-განმარტება. ჩვენების მიცემაზე უარი სისხლის სამართლის დანაშაულია.