პოლიტიკა
ნიკა რურუა: „რობერტ სტურუა მის მიერ გამოთქმული ეთნიკური მეტაფორების გამო გათავისუფლდა“

ruruaaaეს განცხადება საქართველოს კულტურისა და ძეგლთა დაცვის მინისტრმა ნიკა რურუამ დღეს ბათუმში გამართულ ბრიფინგზე გააკეთა. მინისტრის თქმით, სტურუას გათავისუფლება მისთვის ძალიან პრინციპული საკითხია. „სახელმწიფო, რომელიც მოცემულობით მულტიეთნიკური და მულტიკულტურულია, ვერ შეეგუება და ვერ დააფინანსებს ქსენოფობიას. ქსენოფობიაში იგულისხმება ის გამონათქვამები, ეთნიკური მეტაფორები, რომელთაც სტურუა იყენებდა მრავალრიცხოვანი ინტერვიუების დროს“, – განაცხადა რურუამ.

მისივე თქმით, ეს მისთვის არ იყო სასიამოვნო გადაწყვეტილება, თუმცა მინისტრს მიაჩნია, რომ „ტირაჟირებულ ქსენოფობიას მწვანე შუქი არ უნდა აენთოს დემოკრატიულ ქვეყანაში, მით უმეტეს, რომ ეს საქართველოს თავის თავზე ერთხელ უკვე ნაგემი აქვს. ერების დაყოფა კარგ და ცუდ ერებად, ადამიანების დაყოფა კლასებად – ეს იყო, რასაც აკეთებდნენ თავის დროზე ბოლშევიკები და ეს იცის ბატონმა სტურუამ, ის იცნობდა ბოლშევიკებს, ამას აკეთებდნენ თავის დროზე ნაცისტები“.

რურუას მიაჩნია, რომ „ჩვენი დაუძინებელი მტერი ამით აუცილებლად ისარგებლებს, ამის საშუალება თუ ექნება..“

„მივიღე გადაწყვეტილება, რომ ადამიანს, რომელსაც ასეთ ღირებულებათა სისტემა აქვს, არ ეკავოს საკვანძო სახელმძღვანელო პოზიცია, ეს არის და ეს. ზოგადად, სამხატვრო ხელმძღვანელის პოსტი არ უქმდება და ეს პოსტი არც რუსთაველის თეატრში გაუქმდება“, - აღნიშნა მინისტრმა.

გავრცელებული ინფორმაცია რუსთაველის თეატრის მმართველ ზაალ ჩიქობავას მიერ თანამდებობის შესაძლო დატოვების შესახებ მინისტრმა არ დაადასტურა. მისი განმარტებით, ჩიქობავა თანამდებობაზე დარჩება.

ამასთან, რურუამ ისიც აღნიშნა, რომ შოთა რუსთაველის სახელობის სახელმწიფო დრამატული თეატრის სამხატვრო ხელმძღვანელის თანამდებობაზე ახალი კანდიდატურა ამ დროისთვის არ არსებობს.

შეგახსენებთ, რომ რობერტ სტურუა შოთა რუსთაველის სახელობის სახელმწიფო დრამატული თეატრის სამხატვრო ხელმძღვანელის თანამდებობიდან 15 აგვისტოდან გათავისუფლდა. 9 აგვისტოს გამოცემულ შესაბამის ბრძანებას ხელს აწერს კულტურისა და ძეგლთა დაცვის მინისტრი ნიკა რურუა.

 

საქინფორმი