პოლიტიკაში პრაგმატიზმი ეროვნული ინტერესების დაცვის საუკეთესო საშუალებაა, დაადასტურეს ტრამპმა და მისმა გუნდმა, რომლებმაც მიიღეს ათობით ახალი გადაწყვეტილება და გააუქმეს წინა ადმინისტრაციის ასობით ბრძანება 20 იანვრიდან 20 დღის განმავლობაში. გაირკვა, რომ შეერთებულ შტატებში ხელისუფლებაში შეიძლება მოვიდეს პრაგმატიკოსთა გუნდი, რომელსაც არ შეეშინდება უპირველეს ყოვლისა ამერიკელების, და არა რუსებისა და ჩინელების კრიტიკის. შეგახსენებთ ტრამპისა და მისი გუნდის მიერ მიღებული რამდენიმე გადაწყვეტილებას, რომლებიც იცავს შეერთებული შტატების ეროვნულ ინტერესებს და ღირებულია საქართველოსა და რუსეთისთვის.

   ტრამპის განკარგულება „ორი - მამრობითი და მდედრობითი - სქესის აღიარების შესახებ“; ტრამპის განკარგულება „მრავალფეროვნების, თანასწორობისა და ინკლუზიურობის (diversity, equality and inclusion, DEI ) ფედერალური პროგრამის შეწყვეტის შესახებ“; ტრამპის განკარგულება „ანტიქრისტიანული ცრურწმენების წინააღმდეგ ბრძოლის ჯგუფის შექმნის შესახებ“ - ეს სამი განკარგულება არა მხოლოდ აშშ-ის ძირძველ ეროვნულ ინტერესებს იცავს, არამედ ადასტურებს მათ ჰარმონიულ თანხვედრას საქართველოსა და რუსეთის ეროვნულ ინტერესებთან, სადაც მიღებულია კანონები ჰომოსექსუალური პროპაგანდის აკრძალვის, ოჯახის ღირებულებების დაცვისა და ქორწინების შესახებ, როგორც მამაკაცსა და ქალს შორის კავშირის. ანუ ემთხვევა ქართველი და რუსი ხალხების ტრადიციულ ღირებულებებს. კოლიზია არსებობს მხოლოდ ქართულ და ევროპულ ღირებულებებს შორის, რადგან ქართველები არასოდეს ყოფილან და არ იქნებიან ევროპელები, ხოლო ამერიკელების, ქართველებისა და რუსების მენტალიტეტი მსგავსია.

   აღსანიშნავია, რომ ტრამპის განკარგულებას ქრისტიანობის დაცვის შესახებ მოჰყვა საქართველოს პრემიერ-მინისტრის ირაკლი კობახიძის განცხადება, რომელმაც შვეიცარიულ ყოველკვირეულ გამოცემა Die Weltwoche-თან ინტერვიუში განაცხადა: „ჩვენ ვამაყობთ, რომ საქართველო ერთ-ერთი პირველი ქრისტიანული ქვეყანაა მსოფლიოში, ამიტომ განსაკუთრებულ მნიშვნელობას ვანიჭებთ ქრისტიანობას და ყველაფერს ვაკეთებთ ჩვენი რელიგიის დასაცავად. ქრისტიანობისა და რელიგიის დაცვა ჩვენი ისტორიის ნაწილია“. თუ ამას მოჰყვება საქართველოს პრემიერ-მინისტრის ინიციატივა საქართველოს კანონში „დისკრიმინაციის ყველა ფორმის აღმოფხვრის შესახებ“ ცვლილებების შეტანის თაობაზე, რაც შეესაბამება ტრამპის განკარგულებას „მრავალფეროვნების, თანასწორობისა და ინკლუზიურობის შესახებ ფედერალური პროგრამების შეწყვეტის თაობაზე“. და ასევე „ქართული ოცნების“ მიერ დაპირებული კანონის „მართლმადიდებლობის, როგორც სახელმწიფო რელიგიის შესახებ“ მიღება, ეს იქნება დიდი ნაბიჯი ქართული და ამერიკული კანონმდებლობის ჰარმონიზაციისკენ.

   ამასთან, საქართველოს პრემიერ-მინისტრმა უნდა გაითვალისწინოს, რომ აშშ-ის გენერალურმა პროკურორმა პემ ბონდიმ თანამდებობის დაკავების პირველივე დღეს ბრძანა შეწყდეს ფედერალური საგამოძიებო ბიუროს (FBI) საქმიანობა იმ ქვეყნების შესაძლო გავლენის წინააღმდეგ, რომლებიც აშშ-ის შიდა პოლიტიკაზე ზემოქმედებას ცდილობენ, რაც არბილებს აგენტების რეგისტრაციის შესახებ ამერიკულ კანონს (Foreign Agents Registration Act, FARA). ამიერიდან FARA ითვალისწინებს სისხლისსამართლებრივ დევნას მხოლოდ უცხო ქვეყნის მთავრობების მხრიდან ჯაშუშობის შემთხვევაში, ხოლო ამერიკელების დევნა, რომლებიც აშშ-ში ლობირებენ უცხო ქვეყნების ინტერესებს, აკრძალულია. „პროკურორების მხრიდან უფლებამოსილების გადამეტებისა და ბოროტად გამოყენების რისკების თავიდან ასაცილებლად“, - განმარტავს აშშ-ის ახალი გენერალური პროკურორი თავის სამართლიან გადაწყვეტილებას. აქედან გამომდინარე, არავითარი აზრი არ აქვს გასული წლის 24 მაისს საქართველოში მიღებული უცხოური გავლენის გამჭვირვალობის შესახებ კანონის გაუქმებას და „ამერიკული FARA-ს ზუსტი ასლის“ მიღებას, როგორც ამას მმართველი პარტია „ქართული ოცნება“ გვპირდება. საქართველოს მაგალითზე, სადაც სასამართლოსა და პროკურატურაში სააკაშვილის ბევრი ხელდასხმული პირი მუშაობს, FARA-ს კანონის ძველი რედაქციის ზუსტი ასლის მიღება შესაძლებელს გახდიდა ის პოლიტიკური ანგარიშსწორებისთვის გამოყენებულიყო - ნებისმიერი „ვიღაცისთვის“ არასასურველი ორგანიზაცია შეიძლება გამოცხადებულიყო უცხოეთის აგენტად და მის წინააღმდეგ აღძრულიყო სისხლის სამართლის საქმე. 1938 წელს მიღებული და ამა წლის 9 თებერვლამდე მოქმედი ამერიკული FARA- ს ძველი ვერსია ძალიან ახლოს არის რუსეთის ფედერალურ კანონთან "უცხოური გავლენის ქვეშ მყოფი პირების საქმიანობის კონტროლის შესახებ", რომელიც მიღებულ იქნა რუსეთის ფედერაციის სახელმწიფო დუმის მიერ 2022 წლის 24 ივნისს. ხოლო ახალი FARA საქართველოში გასულ წელს მიღებული კანონის მსგავსია. და საერთოდ - საქართველო პატარა ქვეყანაა, განსხვავებული რეალიებით, რომელსაც არ შეეფერება არც ამერიკული, არც რუსული და, მით უმეტეს, ევროპული კანონების ზუსტი ასლები, რომლებსაც მას თავს ახვევენ ევროსტრუქტურები. ეს ფაქტი უნდა გაითვალისწინონ ქართველმა კანონმდებლებმა, რომლებსაც უყვართ დასავლური კანონების გადაწერა.

  დავძენ, რომ აშშ-ის გენერალური პროკურორი პემ ბონდი ცალკე დირექტივით წყვეტს მუშაობას რუსი ოლიგარქების აქტივების ამოღების შესახებ, აჩერებს ოპერატიული ჯგუფის -Task Force KleptoCapture-ის და Kleptocracy Asset Recovery Initiative პროგრამის საქმიანობას, რომლებიც აქტიურად მონაწილეობდნენ ამ პროცესში. რაც ეწინააღმდეგება ქართული რადიკალური ოპოზიციისა და მისი ფასიანი ლობისტების - კონგრესმენი ჯო უილსონის, EPP-ის (ევროპის სახალხო პარტია), ევროპული სტრუქტურების ხელმძღვანელებისა და დასავლელი დიპლომატების ძალისხმევას, რომლებიც დაკავებული არიან საქართველოს პოლიტიკური ლიდერის, მილიარდერი ბიძინა ივანიშვილისა და მისი ოჯახის დევნით.

   მოვიყვან კიდევ ორიოდე მაგალითს ამერიკელი პრაგმატიკოს-რეფორმატორების საქმიანობიდან. ტრამპისა და პლანეტის უმდიდრესი ადამიანის, ილონ მასკის გადაწყვეტილება USAID-ისა და NED-ის დახურვის შესახებ; მილიარდერი მასკის განზრახვა, რომელიც ხელმძღვანელობს მთავრობის ეფექტიანობის დეპარტამენტს (DOGE), დახუროს მედია-კორპორაციები „რადიო თავისუფალი ევროპა/რადიო თავისუფლება (PCE/PC) და „ამერიკის ხმა“. ამ რადიოსადგურების დივერსიული საქმიანობის შეხსენება საჭირო არ არის, რაც შეეხება USAID-ს, შეგახსენებთ, რომ საქართველოში სახელმწიფო გადატრიალების მცდელობა, რომელიც უკვე სამი თვეა გრძელდება, ისევე როგორც ყველა წინა, ასევე სამხრეთ კავკასიაში შექმნილი კონიუნქტურა, არის შეერთებული შტატების საერთაშორისო განვითარების სააგენტოს (United States Agency for International Development, USAID ) „დამსახურება“.

   უკრაინაში სპეცოპერაციის დაწყებისა და ყარაბაღის კონფლიქტის დასრულების შემდეგ სამხრეთ კავკასიაში ვითარება რუსეთის ფედერაციის სასარგებლოდ როდი იცვლება. თუ ადრე სომხეთი რუსეთის სრულფორმატიანი მოკავშირე იყო EAEU-სა და CSTO-ში, აზერბაიჯანი - სტრატეგიული პარტნიორი, და სურათს მხოლოდ ევროკავშირისა და ნატოსკენ მიმავალი პროდასავლური საქართველო „აფუჭებდა“, დღეს სიტუაცია პირიქით შეიცვალა. დღეს სამხრეთ კავკასიაში რუსეთის ყველაზე კეთილმეგობრული ქვეყანა საქართველოა, რომელიც არ მიიღეს ევროკავშირში, რადგან უარი თქვა „მეორე ფრონტის“ გახსნაზე და არ შეუერთდა რუსეთის წინააღმდეგ ეკონომიკურ სანქციებს; ჩვენს თვალწინ უარესდება აზერბაიჯანის ურთიერთობები რუსეთთან, რისი ფორმალური გამომწვევი მიზეზიც იყო აზერბაიჯანული კომპანია „AZAL“-ის ლაინერის - Embraer E190-ის ავიაკატასტროფა; ხოლო რუსეთის მიმართ უარყოფითი დამოკიდებულებით პირველ ადგილზე „პროდასავლური“ სომხეთი გავიდა, რომელმაც უარი განაცხადა რუსულ სამშვიდობო ძალებსა და ОДКБ-ში მონაწილეობაზე, შემდეგ კი – რუსეთის სამხედრო ბაზებზე, როგორც თავის დროზე ეს სააკაშვილის რეჟიმმა საქართველოში გააკეთა..

   თურქეთს აქვს საკუთარი ინტერესები სირიაში, უკრაინასა და აფხაზეთში, რომლებიც ეწინააღმდეგება რუსეთის ფედერაციის ინტერესებს სამივე პრობლემურ ტერიტორიაზე. პრეზიდენტმა ერდოღანმა ისრაელის მხარდაჭერის, ღაზას სექტორიდან პალესტინელების გადასახლების შესახებ ტრამპის გეგმებისა და ასევე, სომხეთთან სტრატეგიული პარტნიორობის შესახებ ქარტიის ხელმოწერის გამო აშშ-ის ახალი ადმინისტრაციის მიმართ კონფრონტაციული პოლიტიკა აირჩია. ეს ყველაფერი რუსეთისა და აშშ-ის მიმართ თურქეთის უახლოესი მოკავშირის, აზერბაიჯანის პოლიტიკას „ამძიმებს“...

   „ჩვენ ვატარებთ პრაგმატულ პოლიტიკას და ეს არის რუსეთის მიმართ ჩვენი პოლიტიკის საფუძველი. ჩვენ ვაგრძელებთ სავაჭრო და ეკონომიკურ ურთიერთობებს რუსეთის ფედერაციასთან“, - განაცხადა საქართველოს პრემიერ-მინისტრმა ირაკლი კობახიძემ გასულ კვირას ტელეარხ Euronews-ის ეთერში. ამასთან, მან აღნიშნა, რომ „რუსეთის მიერ აფხაზეთისა და ცხინვალის რეგიონის დამოუკიდებლობის აღიარების გამო, ამ ეტაპზე მასთან დიპლომატიური ურთიერთობების აღდგენის შესაძლებლობა არ არსებობს“. „ჩვენ გვინდა ჩვენი ტერიტორიული მთლიანობის აღდგენა, ამას ალტერნატივა არ აქვს. ვიმედოვნებთ, რომ რაღაც მომენტში ეს რეალობად იქცევა“, - განაცხადა კობახიძემ და დასძინა, რომ „საქართველოს ტერიტორიული მთლიანობის აღდგენა შესაძლებელია და განიხილება მხოლოდ მშვიდობიანი გზით“. ეს არის საქართველოს პოლიტიკური ლიდერის, მილიარდერი ბიძინა ივანიშვილის პოზიცია, რომელიც უფრო მდიდარია, ვიდრე აშშ-ს ისტორიაში ყველაზე მდიდარი პრეზიდენტი დონალდ ტრამპი.

ბიძინა ივანიშვილს მიაჩნია, რომ დღეს, როდესაც მსოფლიო განიცდის პოლიტიკური კონტინენტების შეჯახებას აშშ-ის 47-ე პრეზიდენტის, დონალდ ტრამპის მიერ წამოწყებული გლობალური ხელახალი ფორმატირების პროცესის შედეგად, საქართველოსთვის საშიშია აშშ-ს, ევროკავშირსა და რუსეთს შორის დაპირისპირების წინა ფლანგზე ყოფნა. საკუთარი ტერიტორიული პრობლემების დროშის უადგილოდ ფრიალით, საქართველო რისკავს, მოექცეს დასავლეთისა და აღმოსავლეთის შორის ამოქმედებული ტექტონიკური ფილების ნაპრალში, რაც საქართველოზე ბევრად ძლიერ სახელმწიფოებსაც კი არაერთხელ დასტყდომიათ თავს. ივანიშვილი დაელოდა, სანამ ქართველი ხალხი თავად უარყოფდა „ცისფერ“ ევროატლანტიკურ დემოკრატიულ ღირებულებებს, ივანიშვილი დაელოდა, სანამ ტრადიციული ღირებულებების დამცველი ტრამპი გახდებოდა შეერთებული შტატების პრეზიდენტი, ახლა ივანიშვილი ელოდება ომის დასრულებას - გარიგებას რუსეთს, აშშ-სა და უკრაინას შორის.

   იალტის კონფერენციიდან ოთხმოცი წლის შემდეგ, ევროპაში ახალი ომი იქცა „აშშ-რუსეთი-ევროპა-ჩინეთის“ კონფიგურაციაში გარდაუვალი ცვლილებების კატალიზატორად, რაც გავლენას ახდენს მთელ მსოფლიოში პოლიტიკურ კლიმატზე. მთავარ მოთამაშეებს შორის ძალთა ბალანსის რადიკალურმა ცვლილებამ გამოიწვია მრავალპოლარული სამყაროს დაბადება, რომელშიც ტრამპს სურს დარჩეს ჰეგემონად, ან თუნდაც პირველად თანასწორთა შორის. ახალმა რეალიებმა შეიძლება დიდი შესაძლებლობები გაუხსნას ისეთ პატარა ქვეყნებსაც, როგორიცაა საქართველო, თუ მათი პოლიტიკური ხელმძღვანელობა გამოავლენს თემატური მოდულური აზროვნების უნარს. ქართული რადიკალური ოპოზიციისა და მისი დასავლელი პატრონებისთვის დამახასიათებელი მოძველებული, არაკრეატიული ვექტორული აზროვნება, მაგალითად, „საქართველო – დასავლეთი“ ან „საქართველო – ჩრდილოეთი“-ს დილემის სახით, უპერსპექტივოა და უნდა დაიძლიოს. საქართველო პოლიტიკაში მოდულურ ტექნოლოგიებზე უნდა გადავიდეს, რადგან პოლიტეკონომიის კანონები ჯერ არ გაუქმებულა. საქართველოს დაინტერესება უცხოური ინვესტიციებით, პროექტები ჩინეთთან, ირანთან, აზერბაიჯანთან და  არაბთა გაერთიანებულ საამიროებთან აიხსნება ეროვნული ინტერსებით, სახელმწიფო ეკონომიკის განმტკიცების პრაგმატული სურვილით, ეს სულაც არ გახლავთ რუსეთთან სავაჭრო-ეკონომიკური თანამშრომლობის განვითარების ალტერნატივა, ანდა პოლიტიკური კონიუნქტურის შედეგი, რომელიც ვითომდა რუსეთის სასარგებლოდ შეიცვალა, როგორც ამის წარმოჩენას საქართველოს არაკეთილმოსურნეები ლამობენ. არა ვექტორული აზროვნება, არამედ სხვადასხვა მოდულისგან საგარეო-პოლიტიკური კონფიგურაციების შექმნის საშუალება ეროვნული ინტერესებიდან გამომდინარე, უპირობოდ წარმოადგენს 21-ე საუკუნის ახალ პოლიტტრქნოლოგიას. სწორედ მოდულური პრინციპით შეიქმნა კოსმოსური სადგურები, რაც მათი ეკიპაჟების უსაფრთხოებას ემსახურება.

   რუსეთ-საქართველოს ურთიერთობების მოწესრიგება გულისხმობს ახალი კონფიგურაციის შექმნას, რომელშიც საქართველოს ტერიტორიული მთლიანობის საკითხებთან დაკავშირებული მოდული გამოეყოფა რუსეთთან დიპლომატიური ურთიერთობების აღდგენის მოდულს ყველა თანმხლები ბონუსით - ვაჭრობა, ეკონომიკა, ტრანსპორტი, შეღავათიანი ტარიფები და BRICS-ში წევრობის განაცხადის შესაძლო წარდგენა - რატომაც არა? დეფრაგმენტაცია და ფორმატირება, იმ მიმართულებების ცალკე მოდულად გამოყოფა, სადაც კონსენსუსის მიღწევა შეუძლებელია მოლაპარაკებების გარეშე, რისთვისაც მზადება ჯერ კიდევ გუშინ უნდა დაწყებულიყო, იმ მიმართულებებიდან, რომლებზეც დღესაც შესაძლებელია პრინციპული შეთანხმება - ეს არის რუსეთ-საქართველოს გაყინული ურთიერთობების გადატვირთვის ერთადერთი მოდელი.

არნო ხიდირბეგიშვილი,
ქართული საინფორმაციო-ანალიტიკური სააგენტო „საქინფორმი“-ს გენერალური დირექტორი და მთავარი რედაქტორი, უშიშროების, სტრატეგიული ანალიზისა და საინფორმაციო პოლიტიკის ცენტრის დირექტორი

2025 წლის 11 თებერვალი
საქართველო, თბილისი