საქართველო, 27 იანვარი, საქინფორმი. თბილისის ავტობუსებსა და სამარშრუტო ტაქსებში დამონტაჟებული გადახდის აპარატები, 24 იანვარს, დილის 10 საათისთვის, მოულოდნელად „ალაპარაკდნენ“. უწყვეტი პროტესტის მესიჯებად ქცეული ფრაზები ზოგიერთ ავტობუსში კიდევ 5 საათი ისმოდა.

გადახდის აპარატებიდან ისმოდა საქართველოს პირველი პრეზიდენტის, ზვიად გამსახურდიას სიტყვები - „აღსრულდა ნება ქართველი ერისა. გაუმარჯოს დამოუკიდებელ საქართველოს! გვფარავდეს ღმერთი!“.

ყოფილი პრემიერ-მინისტრის ზურაბ ჟვანიას ცნობილი გამონათქვამი -„მე ვარ ქართველი და მაშასადამე ვარ ევროპელი!“.

საქართველოსა და ევროკავშირის ჰიმნები.

შეძახილი - „დიდება საქართველოს! დიდება უკრაინას!“.

„ქართული ოცნების“ მილიარდერი დამფუძნებლის - ბიძინა ივანიშვილის სიტყვები - საოკუპაციო რეჟიმისთვის ბოდიშის მოხდის შესახებ.

„ქართული ოცნების“ მიერ არჩეული პრეზიდენტის, მიხეილ ყაველაშვილის ცნობილი გინებაც, პარლამენტის სხდომიდან.

უკრაინის პრეზიდენტის, ვოლოდიმირ ზელენსკის ხმა - „გამარჯობა, საქართველო“.

საპროტესტო მესიჯების გასაჩერებლად აპარატების გათიშვა გახდა საჭირო. შედეგად - საჯარო ტრანსპორტის მგზავრები ფულს ვეღარ იხდიდნენ და უფასოდ მგზავრობდნენ.

მომხდარი მერიამ - თავიდანვე კიბერთავდასხმად შეაფასა. შს სამინისტრომაც გამოძიება სისხლის სამართლის კოდექსის 284-ე მუხლით დაიწყო, რაც „კომპიუტერულ სისტემაში უნებართვო შეღწევას“ გულისხმობს.

„ქართული ოცნების” ხელისუფლებამ დამნაშავეების ძებნა 24 იანვარს, დილიდანვე დაიწყო

„სავარაუდოდ, განხორციელდა კიბერშეტევა, თუმცა საიდან, ვისი ჩართულობით, როგორ, ამას გამოძიება აუცილებლად დაადგენს”, - უთხრა კახა კალაძემ ჟურნალისტებს დღის პირველ ნახევარში, ვიდრე შსს გამოძიების დაწყებას დაადასტურებდა.

ამასთან, სოციალურ ქსელ X-ში გამოქვეყნებულ განცხადებაში ნათქვამია, რომ კიბერშეტევა თბილისის საზოგადოებრივ ტრანსპორტზე ჰაკერულ ჯგუფ „ანონიმუსთან“ დაკავშირებული ქართველი ჰაკერების ჯგუფის მიერ განხორციელდა.