საზოგადოება
ქუჩის კალათბურთის ტურნირში გამარჯვებულნი მერიისგან დაჯილდოვდნენ
ეს ორი დღეა, ქალაქ თბილისის მერიის მხარდაჭერით, ქუჩის კალათბურთში ტურნირი იმართება. მასში მონაწილე 20 გუნდიდან გამარჯვება გუნდ „მიქსს“ ხვდა წილად. თბილისის მერმა გიგი უგულავამ ტურნირში გამარჯვებულ გუნდს მერიის თასი და მთავარი პრიზი – კალათბურთის ევროპის ჩემპიონატზე დასასწრები საგზურები გადასცა.
„ყველა გამოხატავს თავის მხარდაჭერას საქართველოს კალათბურთის ნაკრების მიმართ. ეს ფორმა არის ყველაზე ჯანსაღი ფორმა მხარდაჭერის გამოხატვის, როდესაც შენ თვითონ თამაშობ და საქმის პოპულარიზაციას აკეთებ. ჩვენ ვგეგმავთ, სპორტის სხვა სახეობების პოპულარიზაციის მიზნით ტურნირები მოვაწყოთ, რომლიც ქუჩაში ეწყობა, იქნება ეს ფეხბურთი, კალათბურთი თუ სპორტის სხვა სახეობები. ტურნირში გამარჯვებულს აქვს საშუალება, ვილნიუსში ჩავიდეს და კალათბურთის ევროპის ჩემპიონატს დაესწროს, რომელსაც მერია დააფინანსებს“, – აღნიშნა გიგი უგულავამ ცერემონიალზე.
საქინფორმი
