საქართველო, 21 ნოემბერი, საქინფორმი. საქართველოს საგარეო საქმეთა მინისტრის მოადგილის, ალექსანდრე ხვთისიაშვილის ხელმძღვანელობით, საქართველოს დელეგაცია ჰონგ-კონგს სამუშაო ვიზიტით ეწვია. დელეგაციის შემადგენლობაში საქართველოს სავაჭრო პალატის პრეზიდენტი გიორგი პერტაია და ჩინეთის სახალხო რესპუბლიკაში საქართველოს ელჩი პაატა კალანდაძე იმყოფებოდნენ.

საქართველოს საგარეო საქმეთა მინისტრის მოადგილემ ალექსანდრე ხვთისიაშვილმა მაღალი დონის შეხვედრები გამართა ჩინეთის ჰონგ-კონგის მთავრობის ადმინისტრაციის ხელმძღვანელთან ერიკ ჩან კვოკთან, ასევე ჰონგ-კონგის მთავრობის ტრანსპორტისა და ლოგისტიკის მდივანთან ლამ საი-ჰუნგთან, კომერციისა და ეკონომიკური განვითარების მდივანთან ალგერნონ იაუსთან, კულტურის, სპორტისა და ტურიზმის მდივანთან კევინ იონგთან და ჰონგ-კონგის ვაჭრობის განვითარების საბჭოს აღმასრულებელი დირექტორის მოადგილესთან პატრიკ ლაუსთან.

საქართველოს საგარეო საქმეთა სამინისტროს ინფორმაციით, შეხვედრებზე ქართულმა მხარემ  ჰონგ-კონგის მთავრობის წევრებს  დეტალური ინფორმაცია მიაწოდა საქართველოში არსებული საინვესტიციო და ბიზნეს გარემოს შესაძლებლობების შესახებ. განსაკუთრებული ყურადღება დაეთმო ტრანსპორტის და ლოგისტიკის, ინოვაციების, ტურიზმის და ვაჭრობის სფერობში თანამშრომლობის საკითხებს. ამავე ინფორმაციით, აღინიშნა საქართველოსა და ჰონგ-კონგს შორის 2019 წლის თებერვლიდან მოქმედი შეთანხმება თავისუფალი ვაჭრობის შესახებ, ასევე ის გარემოება, რომ 2024 წლის 30 სექტემბრიდან ორივე მხარის ძალისხმევით ჩინეთის ჰონგ-კონგის სპეციალურმა ადმინისტრაციულმა რეგიონმა საქართველოს მოქალაქეებისთვის უვიზო რეჟიმი აამოქმედა.

მხარეები შეთანხმდნენ თანამშრომლობის შემდგომი გაღრმავების მიზნით ერთობლივი მუშაობის გაგრძელებაზე, ვიზიტების გაცვლასა და „მჭიდრო კავშირების“ შენარჩუნებაზე.

ვიზიტის ფარგლებში, საქართველოს დელეგაციამ  მონაწილეობა მიიღო მაღალი დონის აზიის ლოგისტიკური, საზღვაო და საავიაციო კონფერენციაში, ასევე შეხვედრები გამართა ათამდე მსხვილი ადგილობრივი და წამყვანი საერთაშორისო სატრანსპორტო-ლოგისტიკური და სავაჭრო კომპანიის ხელმძღვანელებთან.