საქართველო, 13 ნოემბერი, საქინფორმი. აფხაზეთში ყველა დაკავებული ე.წ. ოპოზიციონერი გაათავისუფლეს.

ამის შესახებ ინფორმაციას ტელეგრამის არხი „რესპუბლიკა“ ავრცელებს.

ომარ სმირი, გარი კოკაია, ალმასხან არძინბა, რამაზ ჯოპუა და ასლან გვარამია 11 ნოემბერს დააკავეს.

ე.წ. ხელისუფლება აცხადებს, რომ მათ ე.წ. პარლამენტის დეპუტატის მიმართ „არამართლზომიერი ქმედებები“ ჩაიდინეს.

ოკუპირებულ აფხაზეთში ე.წ. ოპოზიციონერების დაკავებას საპროტესტო აქცია მოჰყვა.

აქციის მონაწილეებმა კოდორის და გუმისთის ხიდები გადაკეტეს და განაცხადეს, რომ არ დაიშლებოდნენ ხუთივე დაკავებულის გათავისუფლებამდე.

აქციის მონაწილეები ე.წ. სახელმწიფო უსაფრთხოების სამსახურის შენობასთან შეიკრიბნენ, სადაც ავტომობილით ჭიშკარი შეანგრიეს. ოკუპირებული აფხაზეთის ე.წ. პრეზიდენტის რეზიდენციასთან კი სამხედრო ტექნიკა დააყენეს.

ღამით გაიმართა აფხაზეთის ე.წ. უშიშროების საბჭოს საგანგებო სხდომა.

„ძვირფასო თანამემამულეებო, მოგმართავთ თხოვნით, შეინარჩუნოთ სიმშვიდე, არ აჰყვეთ პროვოკაციებს. აფხაზეთის რესპუბლიკის სამართალდამცავ ორგანოებს გააჩნიათ საკმარისი ძალები და საშუალებები, რათა უზრუნველყონ უსაფრთხოება და მართლწესრიგი ქვეყანაში“, – განაცხადა ე.წ. პრეზიდენტმა, ასლან ბჟანიამ მიმართვაში.

ცნობისთვის, ოპოზიციის პროტესტი აფხაზეთში „რუსული ინვესტიციების შეღავათიანი პირობების შესახებ“ ე.წ. შეთანხმების პროექტს მოჰყვა, რომელსაც ე.წ. პარლამენტმა კენჭი უნდა უყაროს. ე.წ. შეთანხმება რუსული ინვესტიციებისთვის საგადასახადო შეღავათებს ითვალისწინებს.

დოკუმენტის დამტკიცებას აფხაზეთის დე ფაქტო პარლამენტი 15 ნოემბერს გეგმავს.