საქართველო, 24 სექტემბერი, საქინფორმი. პრეზიდენტმა სალომე ზურაბიშვილმა „უცხოელი აგენტების“ შესახებ კანონის მოწინააღმდეგე აქტივისტი, რომელსაც რამდენიმე დღის წინ სასამართლომ ოთხწლიანი პატიმრობა შეუფარდა, 20 სექტემბერს შეიწყალა.

შანიძე კანონის საწინააღმდეგო აქციების დროს დააკავეს. თავდაპირველად პროკურატურამ მას ბრალი სისხლის სამართლის კოდექსის 187-ე მუხლის პირველი ნაწილით წარუდგინა. მოგვიანებით მას ბრალი ასევე წაუყენეს ნარკოტიკული საშუალების შემცველი მცენარის უკანონო დათესვის, მოყვანის ან კულტივირების მუხლით. შანიძის მხარდამჭერებმა სასამართლოს გადაწყვეტილება სამაგალითო დასჯად შეაფასეს, გადამწყვეტი არჩევნების წინ ოპონენტების დასაშინებლად.

პრეზიდენტის ადმინისტრაციის მიერ გავრცელებულ განცხადებაში შეწყალებულის გვარი არ სახელდება და მხოლოდ წერია, რომ მსჯავრდებული პირი „სრულად გათავისუფლდა პენიტენციურ დაწესებულებაში თავისუფლების აღკვეთის სახით დანიშნული სასჯელის შემდგომი მოხდისაგან“.

საპატიმროს დატოვებისას, შანიძემ ჟურნალისტებს უთხრა, რომ გადაწყვეტილება „მოულოდნელი“ იყო. მისი თქმით, იგი დანაშაულს აღიარებს, თუმცა მიაჩნია, რომ სასჯელი შეუსაბამო იყო.

ეს უკვე მეორე შემთხვევაა, როდესაც პრეზიდენტმა ზურაბიშვილმა „უცხოელი აგენტების“ შესახებ კანონის მოწინააღმდეგე აქტივისტი შეიწყალა. აპრილში, მან ლაზარე გრიგორიადისი შეიწყალა, რომელსაც 2023 წლის მარტის აქციების დროს პოლიციელისთვის ე.წ. „მოლოტოვის კოქტეილის“ სროლისა და პოლიციის მანქანის დაწვისთვის 9-წლიანი პატიმრობა ჰქონდა შეფარდებული. თავად, გრიგორიადისი ამ ბრალდებებს უარყოფს.