საქართველო, 21 ივლისი, საქინფორმი. ავტომობილის მოძრაობის უსაფრთხოების წესის დარღვევის ფაქტზე, რამაც ადამიანის სიცოცხლის მოსპობა გამოიწვია, დაკავებულ საპატრულო პოლიციის დეპარტამენტის თანამშრომელს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა.
სასამართლო სხდომაზე ბრალდებულმა სიტყვით გამოსვლის უფლებით ისარგებლა და მომხდარ ფაქტთან დაკავშირებით ოჯახის წევრებს სამძიმარი გამოუცხადა.
დაცვის მხარემ აღკვეთის ღონისძიების სახით გირაოს გამოყენებით იშუამდგომლა, რაც მოსამართლე ნატო ხუჯაძემ არ დააკმაყოფილა.
პროკურორის განცხადებით, დაკავებულს ბრალდება საქართველოს სისხლის სამართლის კოდექსის 276-ე მუხლის მე-6 ნაწილით წარედგინა, რაც გულისხმობს სატრანსპორტო საშუალების მოძრაობის უსაფრთხოების წესის დარღვევას, რამაც ადამიანის სიცოცხლის მოსპობა გამოიწვია.
აღნიშნული სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.