საქართველო, 21 ივნისი, საქინფორმი. ეს არის რუსული ძალა, რომელიც რუსულ ინტერესებს ემსახურება, - ასე შეაფასა პარტია „ლელოს“ ლიდერმა, მამუკა ხაზარაძემ „ხალხის ძალის“ განცხადება.
როგორც ხაზარაძემ ჟურნალისტებს განუცხადა, „ხალხის ძალა“ და „ქართული ოცნება“ ერთი ფრთაა და ისინი ისე გაქრებიან პოლიტიკური ველიდან, როგორც შარშანდელი თოვლი.
„ეს არის ბიძინა ივანიშვილის ერთ-ერთი ფრთა, რომელიც რეალურად, ბიძინა ივანიშვილის და „ქართული ოცნების“ განზრახვებს ახმოვანებს, რომ ჩამოაშოროს საქართველო დასავლურ ცივილიზაციას და შეიყვანოს ჭაობში, ამას არ დავუშვებთ. ისინი ისე გაქრებიან პოლიტიკური ველიდან, როგორც შარშანდელი თოვლი", - განაცხადა ხაზარაძემ.
ცნობისთვის, „ხალხის ძალა“ საქართველოში ამერიკის შეერთებული შტატების ელჩის, რობინ დანიგანის მიერ „ინტერპრესნიუსთან“ ინტერვიუსას გაკეთებულ განცხადებებს ქართველი ხალხის მიმართ „უკიდურესად შეურაცხმყოფელს“ უწოდებს და ამბობს, რომ ელჩმა „წითელი ხაზი“ გადაკვეთა.
ამასთან, როგორც განცხადებაშია ნათქვამი, ყველაფერს გააკეთებენ ქვეყნის სუვერენიტეტის გასაძლიერებლად და ეკონომიკური მდგომარეობის გასაუმჯობესებლად, "თუნდაც ეს იმ - მხოლოდ ფურცელზე დაწერილი და ჰაერზე ნათქვამი - "სტრატეგიული პარტნიორობის" გადახედვად დაგვიჯდეს, რის მუქარასაც ბოლო პერიოდში სულ უფრო ხშირად ვისმენთ და თანაც ყოველ ჯერზე უფრო და უფრო მაღალი პოლიტიკური თანამდებობის პირებისგან".