პოლიტიკა
სააკაშვილი ბელარუსის აქტიურ ქომაგად რჩება
საქართველოს პრეზიდენტი მიხეილ სააკაშვილი ბელარუსს ამჯერად პოლონეთის პრეზიდენტ ბრონისლავ კომოროვსკისთან შეხვედრის დასრულების შემდეგ გამართულ ერთობლივ პრესკონფერენციაზე გამოექომაგა. პრეზიდენტის განცხადებით, ბელარუსთან მიმართებაში იზოლაციის პოლიტიკის წარმოება ზრდის შანსს, ქვეყანა რუსეთის მთავრობის სრულ კონტროლქვეშ მოექცეს.
„ბელარუსთან დაკავშირებით პოლონეთის პრეზიდენტსაც ვესაუბრე. ჩვენ გვესმის, რა პრობლემებიც არსებობს ბელარუსში. იმის მტკიცება, რომ რუსეთი ბელარუსზე დემოკრატიული ქვეყანაა, აბსურდია. ბელარუსი, რუსეთისგან განსხვავებით, მისი მეზობელი ქვეყნის ოკუპაციას არ ახორციელებს და მასთან მიმართებაში იზოლაციის პოლიტიკის წარმოება, როგორც ეს ზოგჯერ ხდება, ზრდის შანსს იმისა, რომ ბელარუსი რუსეთის მთავრობის სრულ კონტროლქვეშ მოექცეს და სუვერენიტეტი დაკარგოს, რაც მთელი რეგიონისთვის ძალიან ცუდი იქნება, რადგან ეს ძალიან ნიჭიერი ერია“, – განაცხადა პრეზიდენტმა.
მისივე თქმით, „ყველა იმ საკითხზე, რომელიც შეშფოთებას იწვევს, როგორც არასდროს, დიალოგის წარმოებაა აუცილებელი“.
საქინფორმი
