საქართველო, 24 ოქტომბერი, საქინფორმი. საქართველოს პარლამენტის დელეგაცია, არჩილ თალაკვაძის ხელმძღვანელობით, ყირიმის საერთაშორისო პლატფორმის მეორე საპარლამენტო სამიტში მონაწილეობის მისაღებად პრაღაში იმყოფება. ინფორმაციას საქართველოს პარლამენტის პრესსამსახური ავრცელებს.

მათივე ცნობით, სამიტი წელს უკრაინისა და ჩეხეთის ორგანიზებით იმართება. სამიტის მიზანია, კოორდინაცია გაუწიოს უკრაინისთვის სოლიდარობის და მხარდაჭერის გამოხატვას. ყირიმის საერთაშორისო პლატფორმა მიზნად ისახავს ყირიმის მიმდინარე ოკუპაციაზე საერთაშორისო რეაგირების ეფექტიანობის გაუმჯობესებას და უსაფრთხოების გამოწვევებზე რეაგირებას. უკრაინის მხარდასაჭერად პრაღაში პარლამენტარები მთელი ევროპიდან შეიკრიბებიან.

სამიტში მონაწილეობის მისაღებად პარლამენტის თავმჯდომარის მოადგილე, უკრაინასთან მეგობრობის ჯგუფის ხელმძღვანელი არჩილ თალაკვაძე, ევროპასთან ინტეგრაციის კომიტეტის თავმჯდომარე მაკა ბოჭორიშვილი და საგარეო კომიტეტის თავმჯდომარის პირველი მოადგილე მარიამ ლაშხი გაემგზავრნენ.

სამიტის ფარგლებში, საქართველოს პარლამენტის დელეგაციის ხელმძღვანელი არჩილ თალაკვაძე მონაწილეებს სიტყვით მიმართავს და ისაუბრებს როგორც უკრაინაში მიმდინარე მოვლენებზე, ასევე უკრაინის, საქართველოსა და მოლდოვის ევროკავშირში ინტეგრაციაზე.

ვიზიტის ფარგლებში საქართველოს პარლამენტის დელეგაციის წარმომადგენლები კოლეგებთან ორმხრივ შეხვედრებს გამართავენ.