საქართველო, 19 ივლისი, საქინფორმი. უსამშობლო არახამიას ვურჩევდი საქართველოს თავი დაანებოს - გამოძიება სააკაშვილის მიერ უკრაინის საზღვრის უკანონოდ კვეთაზე დაიწყონ ან ღიად თქვან, რომ ამაში ჩართულნი იყვნენ უკრაინის თანამდებობის პირები, - ამის შესახებ საპარლამენტო უმრავლესობის წევრმა ალუდა ღუდუშაურმა განაცხადა, რითაც მიხეილ სააკაშვილის შესახებ დავით არახამიას განცხადებას გამოეხმაურა.

ღუდუშაური არახამიას ურჩევს, რომ „უკრაინის შიდა საქმეებით დაკავდეს“ და „რესურსები, თუ ასეთი გააჩნია“ უკრაინელ ხალხს მოახმაროს“.

ღუდუშაურის თქმით, არახამიასი და არც „მისნაირების“ არ ეშინიათ.

„არახამიას ქცევები, განსაკუთრებით ბოლო პერიოდში, ნორმალურობისგან და ყოველგვარი რეალობისგან დაცლილია. როგორც ჩანს, არახამიას სხვა საქმე არ აქვს, ვურჩევდი უკრაინის შიდა საქმეებით დაკავდეს, როცა ძალიან მძიმე ვითარებაა და უკრაინელი ხალხის ინტერესებს მოახმაროს რესურსები, თუ ასეთი გააჩნია და თავი დაანებოს საქართველოს. მკაფიოდ მინდა ვუთხრა - არავის გვეშინია! მით უმეტეს, არახამიას და მისნაირების როგორ შეიძლება გვეშინოდეს, ეს უბრალოდ, ღიმილისმომგვრელია. როგორც ჩანს, სუბრეალურ რეალობაში იმყოფება და რეალობას მოწყვეტილია, თუ დაბრუნდება რეალობაში, მისთვის ეს კარგი იქნება. გამოძიების დაწყებას რაც შეეხება, იმ ადამიანის კვალიფიკაციაზე როგორ შეიძლება ვისაუბროთ, რომელიც რეალობისგან დაცლილია და ყოველგვარი წითელი ხაზი აქვს გადაკვეთილი. აბსოლუტურად წარმოუდგენელ განცხადებებს აკეთებს კვალიფიკაციასთან დაკავშირებით, რომ თურმე გამოძიება უნდა დაიწყოს, თან მკვლელობის მომზადებაზე. მე მას ვურჩევდი, კარგად წაიკითხოს მათ შორის, უკრაინის კანონმდებლობა და თუ გამოძიება რამეზეა დასაწყები, ყველა მტკიცებულება სახეზე აქვთ და დაიწყონ გამოძიება როგორ უკანონოდ გადმოკვეთა სააკაშვილმა უკრაინის საზღვარი და თუ ეს ასე არ მომხდარა, მაშინ განმარტება გააკეთოს და ღიად თქვას, რომ უკრაინის საზღვარი უკანონოდ არ გადაუკვეთავს და ამაში ჩართულნი იყვნენ უკრაინის თანამდებობის პირები. კიდევ ვურჩევდი, ქართველ ხალხს და საქართველოს ამ უსამშობლო ადამიანმა თავი დაანებოს”, - განაცხადა ღუდუშაურმა.

ინფორმაციისთვის, დავით არახამიას განცხადებით, მას შეუძლია უკრაინის გენერალურ პროკურორს მიმართოს, რომ სისხლის სამართლის გამოძიება დაიწყოს მიხეილ სააკაშვილის მკვლელობის მცდელობის ფაქტზე.

„რასაც საქართველოს მთავრობა აკეთებს, მკვლელობის მცდელობაა“, - განაცხადა არახამიამ.